Đơ̆ng rŏng kơ năm ngôi asong tơmam hmach thơ thâu kơ ŭnh hnam kră jang kach mạng sơ̆ Nguyễn Trung Lựu (tơ̆ phường Ba Hàng, pơlei tơm Phổ Yên), Tổng Bí thư păng Khŭl bơ̆jang năm lăng Hơp tak xăh hla che Hảo Đạt, xăh Tân Cương, pơlei tơm Thái Nguyên.

Pơma tơ̆ jơ bơ̆jang hăm Khŭl chĕp kơ̆l Anih Đảng dêh char  Thái Nguyên, Tổng Bí thư Nguyễn Phú Trọng pơma hơdăh, jĭ dêh char đei anih dơ̆ng bơ̆ jang tôch kơ gĭt kăl, jĭ tơring ƀĕnh tơdrong joăt joe ‘mêm kơ teh đak păng kach mạng, hơnih vei răk lơ kơ jă kăp gĭt joh ayŏ kơ kon pơlei dôm hơdrĕch hơdrŭng. Tổng Bí thư Nguyễn Phú Trọng athei, Đảng bộ dêh char Thái Nguyễn kăl kơ hlôh vao ƀlep păng jrŭ hloh dơ̆ng găh tơdrong atŭm; băt hơdăh tơmam ‘lơ̆ng, đei yua kơ tơring vă đơ̆ng noh tơlĕch đei tơdrong hơgăt, athei, rơih iŏk hơnăp jang tơm păng tơdrong jang tŏk vă akŏm chĕp kơ̆l, pơgơ̆r, pơm hơyak tơplih ‘nao, pran kơtang hloh lơ̆m hơtŏk tơiung mŭk drăm - tơpôl.