VOV4.Bahnar - ‘Năr  25 khei 01 sơ năm 2022 (vă khan ‘năr 23 khei 12 sơ năm Tân Sửu), Tổng Bí thư Nguyễn Phú Trọng păng Tổng Bí thư, Kơ dră teh đak Trung Quốc Tập Cận Bình hlôi gơ̆ih băl kơ thơ Hmach chơt hơ iă kơ sơ năm ‘nao ƀlep ƀơ̆t kon pơ lei 2 teh đak Việt Nam păng Trung Quốc hơ met ăn sơng Têt Nguyên đán Nhâm Dần. 

Yak truh sơ năm 2022, 2 ƀok Tổng Bí thư athei rim anih tơm, anih jang păng tơ ring 2 teh đak jang kiơ̆ tơ păt đon hlôh vao atŭm gĭt kăl, tŭn pran jang hơ dai mă ‘lơ̆ng găh mŭk drăm -mơ dro sa păng tơ mơ̆t jên jang, pơ trŭt tơ ƀơ̆p pơ ma dơ nuh băl đơ̆ng kon pơ lei hăm lơ trong jang hơ iă, jang hơ dai kơ jăp lơ̆m tang găn jĭ hơ buh, vei lăng păng hơ met ‘lơ̆ng  tơ drong ư̆h kơ lăp băl kiơ̆ lơ̆m pơ ma đam rơ ngei, lăp hăm khôi luơ̆t apŭng plĕnh teh, tơ gop hơ nhăk tơ drong pơ vei tơ bôl, jang hơ dai tôm tong Việt Nam - Trung Quốc hơ tŏk tơ iung ‘lơ̆ng hơ iă, kơ jăp, pơm lăp đei yua ‘lơ̆ng, đunh đai đơ̆ng 2 Đảng, 2 teh đak păng kon pơ lei 2 teh đak, yua kơ tơ drong rơ ngei, sơ đơ̆ng, jang hơ dai păng hơ nŭk hơ noa kơ tơ ring păng apŭng plĕnh teh. 2 ƀok Tổng Bí thư hmach kơ Đảng, teh đak păng kon pơ lei 2 teh đak Việt Nam - Trung Quốc sơng Têt Nhâm Dần sơ đơ̆ng, hiôk hian păng jơ nei.

Thuem: Tơ blơ̆