VOV4.Bahnar - ‘Năr 16/8, tơ̆ anih bơ̆ jang kơ Trung ương Đảng, ƀok Tổng Bí thư Nguyễn Phú Trọng pơ gơ̆r hop akŏm Ban Bí thư vă set hơ len, pơm kiơ̆ ki luơ̆t Khŭl chĕp kơ̆l đảng Anih vei lăng kon pơ lei dêh char Gia Lai dôm jăl jang 2016- 2021, 2021 - 2026 păng ƀok Võ Ngọc Thành, Phó Bí thư Anih jang Đảng dêh char, Bí thư Khŭl chĕp kơ̆l Đảng, Kơ dră Anih vei lăng kon pơ lei dêh char Gia Lai. Lăng kiơ̆ tơ drong hiong răm, tơ drong tơm pơm glăi păng tơ drong hơ găt đơ̆ng Đảng găh ki luơ̆t khŭl jang đảng, đảng viên pơm glăi, Ban Bí thư tơ chơ̆t pơm kiơ̆ ki luơ̆t pơ tho đon Khŭl chĕp kơ̆l đảng Anih jang vei lăng kon pơ lei dêh char Gia Lai jăl jang 2016 - 2021; pơ ma hil kơ khŭl chĕp kơ̆l đảng Anih vei lăng kon pơ lei dêh char Gia Lai jăl jang 2021 - 2026; Kăt kơ chư̆k Phŏ Bí thư Anih jang Đảng dêh char Gia Lai dôm jăl jang 2015 - 2020, 2020 - 2025 păng Bí thư Khŭl chĕp kơ̆l đảng Anih vei lăng kon pơ lei dêh char Gia Lai dôm jăl jang 2016 - 2021, 2021 - 2026 hăm ƀok Võ Ngọc Thành. Athei dôm anih jang kơ pal ki luơ̆t găh hành chính kiơ̆ ƀlep tơ drong hơ găt hăm tơ pôl, kơ dih hlôi đei ki luơ̆t đảng.

Thuem: Tơ blơ̆