‘Năr 23/10, tơ̆ Anih jang Trung ương Đảng, Anih tơm Chĭnh trĭ, Ban Bí thư pơ gơ̆r hop akŏm lơ̆m teh đak kơ tă hơ dai hăm trực tuyến vei kơ jăp păng tơ lĕch jang tơ drong Tơ chơ̆t 24 đơ̆ng Anih tơm Chĭnh trĭ jăl 13 găh hơ tŏk tơ iung mŭk drăm tơ pôl, vei sơ đơ̆ng teh đak tơ̆ Tơ ring hơ lĕch Pơ băh truh sơ năm 2030 lăng truh sơ năm 2045. Tổng Bí thư Nguyễn Phú Trọng pơ gơ̆r păng đei ƀai pơ ma pơ gơ̆r gĭt kăl tơ̆ hop akŏm. Tơ ring Hơ lĕch Pơ băh ‘noh đei Pơ lei tơm Hồ Chí Minh păng 5 dêh char găh Trung ương: Tây Ninh, Bình Phước, Bình Dương, Đồng Nai, Bà Rịa - Vũng Tàu. Jĭ tơ ring đei anih dơ̆ng, hơ năp jang tôch kơ gĭt kăl lơ̆m hơ tŏk tơ iung mŭk drăm - tơ pôl, vei sơ đơ̆ng teh đak păng jang tơ bôl kơ teh đak.

Jơ hop akŏm

Pơ ma pơ gơ̆r tơ̆ Hop akŏm, Tổng Bí Thư Nguyễn Phú Trọng lui ngeh akhan: Kơ dră Đảng, kơ dră chĕp kơ̆l tơ ring păng kon pơ lei dôm dêh char lơ̆m tơ ring Hơ lĕch Pơ băh khŏm gô hơ tŏk pran kơ tang hloh dơ̆ng tơ drong hlôh vao tơ plih ‘nao, joăt joe kach mang, nuh mơng ang hơ dăh păng jơ hngơ̆m đon ‘lơ̆ng kăp gĭt, tôch kơ ‘lơ̆ng hơ iă, hơ bĕch hơ băl, hơ gei, ƀĕnh tơ drong ‘mêm đơ̆ng bơ ngai tơ ring Hơ lĕch; kŭm hăm dôm anih jang, anih tơm, anih jang Trung ương păng rim kơ dră păng khŭl kơ dră rim tơ ring lơ̆m teh đak, hơ drin pran kơ tang hloh dơ̆ng, khŏm jang kiơ̆ jơ nei tơ drong Tơ chơ̆t đơ̆ng Anih tơm Chĭnh trĭ ‘măng âu, pơm hơ yak tơ plih ‘nao, đei tơ drong hơ iă lơ̆m tơ drong hơ tŏk tơ iung mŭk drăm - tơ pôl păng vei sơ đơ̆ng teh đak tơ̆ tơ ring Hơ lĕch Pơ băh.