VOV4.Bahnar - Kơ sơ̆ ‘năr 8/7 tơ̆ anih jang Trung ương Đảng, hăm tơ drong chĕp kơ̆l đơ̆ng Tổng Bí thư Nguyễn Phú Trọng, Anih tơm Chĭnh trĭ, Ban Bí thư hlôi hop akŏm, set hơ len dôm tơ drong kăl kơ teh đak, tơ drong apŭng plĕnh teh lơ̆m jăl khei mă II păng 6 khei blŭng sơ năm 2022; hơ năp jang tơm tơ̆ hơ năp kơnh.

Anih tơm Chĭnh trĭ, Ban Bí thư lăng ‘lơ̆ng, tơ̆ hơ năp kơnh teh đak bơ̆n hơ nơ̆ng tơ jră muh măt hăm lơ mơ mat tat, long nol, rŏ lăng pơm hiơ̆ hê̆ tơ drong tơ iung ming păng hơ tŏk tơ iung mŭk drăm - tơ pôl yua đơ̆ng đei ƀôh ưh kơ ê đơ̆ng tơ drong mŭk drăm - chĭnh trĭ apŭng plĕnh teh, tơ drong tơ blăh tơ blŭng Nga - Ukraine đei ƀôh krê hơ mơt; pơ jei băl tơ drong jang đơ̆ng dôm teh đak tih roi ‘năr roi kơ tang; tơ drong hơ tŏk kơ jă lơ dêh hnang, kơ jă đak dâu tŏk măk, trong jang pơm tŏ sĕt tơ drong jang tơ gŭm jên tơ̆ lơ teh đak, tơ drong vei sơ đơ̆ng tơ drong jang khăm, hơ met jĭ păng vei lăng jơ hngơ̆m jăn kon pơ lei. Anih tơm Chĭnh trĭ, Ban Bí thư athei rim kơ dră, rim anih jang, pơ gơ̆r hŏk pơ hrăm, vei kơ jăp, tơ roi tơ băt păng tơ lĕch jang kiơ̆ tơ tom, đei yua dôm tơ drong tơ chơ̆t hop akŏm ‘măng mă 5 Anih chĕp kơ̆l pơ gơ̆r Trung ương Đảng jăl XIII.

Thuem: Tơ blơ̆