VOV4.Bahnar - Pơ gê ‘năr 20/1, tơ̆ Anih jang Trung ương Đảng, Anih pơ gơ̆r jang Trung ương găh tang găn sa pơ jĭp, ưh kơ ‘lơ̆ng hop a kŏm ‘măng mă 21 hăm tơ drong pơ gơ̆r đơ̆ng Tổng Bí thư Nguyễn Phú Trọng, vă hơ len lăng pơ tôch jang kiơ̆ bơ̆ jang sơ năm 2021 păng ăn tơ gop nơ̆r găh Tơ drong jang bơ̆ jang sơ năm 2022 đơ̆ng Anih pơ gơ̆r jang. Lơ̆m sơ năm 2021, mă đơ̆ng jĭ hơbuh Covid-19 oei tôch krê hơ mơt; tơ drong jang đơ̆ng Anih pơ gơ̆r jang hlôi đei tơ lĕch jang bơ̆ jang kiơ̆ tơ păt păng jang đang kiơ̆ trong tơ lĕch ăn. Mă loi ‘noh, lơ̆m sơ năm sơ̆, lơ̆m teh đak hlôi tơ kêng, dăr hơ len 390 ‘măng yoch lơ̆m 1.011 ‘nu pơm glăi găh sa pơ jĭp, kơ chư̆k jang. Tơ roi găh tơ drong jang tơm tơ̆ hơ năp kơnh, Tổng Bí thư Nguyễn Phú Trọng athei, rim kơ dră đảng, khŭl jang đảng, anih jang kơ pal ưh kơ gơh pơm pơ hơi, lăp đon hăm dôm jơ nei iŏk đei; athei hơ drin tŭn pran hloh dơ̆ng tơ drong jang iung jang tang găn sa pơ jĭp, ưh kơ ‘lơ̆ng; hơ tŏk loi dơ̆ng tơ drong jang hơ len lăng, dăr lăng. Tơ̆ jơ hop akŏm, Anih pơ gơ̆r jang hlôi pơ ma dơ nuh, ăn tơ gop nơ̆r vă chih pơ keh hla ar tơ drong jang bơ̆ jang sơ năm 2022 đơ̆ng Anih pơ gơ̆r jang.

Thuem: Tơ blơ̆