VOV4.Bahnar - Kơ sơ̆ ‘năr 31/3,  tơ̆ Anih bơ̆ jang Trung ương Đảng, Tổng Bí thư Nguyễn Phú Trọng hlôi pơ ma điên thoăi hăm Thủ tướng Liên bang Đức, Kơ dră chĕp kơ̆l Đảng Dân chủ Xã hội Đức Ô-láp Sôn (Olaf Schoz).Tơ̆ ‘măng pơ ma điên thoăi, Thủ tướng Ô-láp Sôn hmach chơt hơ iă jơ nei đơ̆ng Việt Nam lơ̆m hơ tŏk tơ iung teh đak, hơ tŏk ‘lơ̆ng hơ năp jang păng anih dơ̆ng apŭng plĕnh teh păng sơ kơ̆t hơ dăh tơ drong lăng kăl đơ̆ng Đức hăm tơ drong pơ vei jang hơ dai Đức - Việt Nam tŏk bŏk hơ tŏk tơ iung ‘lơ̆ng hơ iă, đei lơ tơ mam ‘lơ̆ng vă hơ nơ̆ng hơ tŏk tơ iung pran kơ tang. 2 kơ dră chĕp kơ̆l drơ̆ng nơ̆r gô pơ gơ̆r tơ drong pơ trŭt jang hơ dai lơ̆m rim tơ drong jang 2 teh đak vang bơ ngơ̆t truh tơ̆ hơ năp kơnh.

Găh Biển Đông, 2 teh đak drơ̆ng nơ̆r găh tơ drong kăl đơ̆ng tơ drong vei lăng rơ ngei, sơ đơ̆ng, jang hơ dai, hơ tŏk tơ iung păng lui yom khôi luơ̆t apŭng plĕnh teh, lơ̆m noh đei tơ chơ̆t sơ năm 1982 đơ̆ng Liên hợp quốc găh Luơ̆t đak dơ sĭ. Găh tơ drong ‘nâu, Tổng Bí thư Nguyễn Phú Trọng pơ ma hơ dăh tơ drong jang đơ̆ng Việt Nam ‘noh lui yom dôm tơ drong pơ kăp ‘lơ̆ng đơ̆ng Liên hợp quốc, ‘meh vă dôm pang ƀơm truh pơ trŭt pơ ma dơ nuh, pơ ma đam vă pơ tôch tơ drong tơ blăh, pơ jing dơ̆ng tơ drong rơ ngei kiơ̆ lơ̆m lui yom đei yua trŏ ƀlep đơ̆ng dôm pang, lăp hăm khôi luơ̆t apŭng plĕnh teh.

Thuem: Tơ blơ̆