Hơ nơ̆ng bơ̆ jang lơ̆m ‘măng năm hơ pong tơ̆ Trung Quốc, pơ gê 1/11, Tổng Bí thư Nguyễn Phú Trọng tơ ƀâp, pơ ma nuh hăm Thủ tướng tĕh đak Trung Quốc Lý Khắc Cường. Tổng Bí thư Nguyễn Phú Trọng akhan, Việt Nam păng Trung Quốc jĭ 2 tĕh đak jê̆ băl, đei tơ drong pơ vei ‘lơ̆ng hơ iă đơ̆ng sơ̆, đei lơ tơ drong lei lăi băl găh tơ drong jang chinh trĭ păng trong jang tŏk.

Rup jơ tơ ƀâp, pơ ma nuh

Ƀar Đảng, ƀar tĕh đak păng kon pơ lei ƀar tĕh đak ‘măn ăn băl ƀĕnh tơ drong tơ gŭm kăp gĭt lơ̆m tơ drong tơ blăh iŏk rơ ngei adrol sơ̆ păng tơ drong jang tơ iung pơ jing chủ nghĩa xã hội hrei ‘nâu. Việt Nam tôch năng kăl păng hơ nơ̆ng tơ gŭm pơm hơ tŏk tơ drong pơ vei hăm Trung Quốc; hơ drol dăh mă đơ̆ng rŏng nhen mĭnh, ưh đei tơ plih kiơ, khŏm druh kiơ̆ trong jang “mĭnh tĕh đak Trung Quốc”.

Tổng Bí thư Nguyễn Phú Trọng tơ ƀâp, pơ ma nuh hăm Thủ tướng tĕh đak Trung Quốc

Tơ̆ jơ pơ ma nuh, 2 păh tơ ƀôh đon hơ iă tơ̆ hơ năp trong jang tŏk pran ‘lơ̆ng đơ̆ng tơ drong pơ vei kơ 2 Đảng, 2 tĕh đak khei ‘năr âu ki. 2 păh drơ̆ng nơ̆r lơ̆m klhei ‘năr jang tŏk ‘nao đơ̆ng 2 Đảng, 2 t/đ păng apŭng plenh tĕh hrei ‘nâu, kăl hơ tŏk tơ drong jang hơ doi lơ̆m rim tơ drong, vei kơ jăp tơ drong pơ gơ̆r pơ ma nuh hăm băl, tơ drong tơ ƀâp tih, hơ tŏk đon lui chinh trĭ, jang tŏk ming dơ̆ng; hơ tŏk tơ drong jang hơ doi găh tĕch mơ dro, tơ mât jên jang, pơ jing jơ hngâm pran ăn tơ drong jang tŏk đơ̆ng tơ drong pơ vei kơ 2 tĕh đak; jang hơ doi pơm hơ tŏk kơ sô̆ jên tĕch mơ dro 2 pang tŏk sơ đơ̆ng ‘lơ̆ng păng kơ jăp đunh.