VOV4.Bahnar - Đơ̆ng rŏng hlŏh 3 jơ păr, ƀât 13 jơ 20 kơ sơ̆ ‘năr 30/10 (kiơ̆ jơ tơ̆ tơ ring), gre păr chơ ƀok Tổng Bí thư Nguyễn Phú Trọng păng Khul tang măt Việt Nam păr jur tơ̆ cham gre păr Bắc Kinh, pơ tơm năm hơ pong ngôi tơ pă tơ̆ tĕh đak CHND Trung Hoa kiơ̆ nơ̆r krao đơ̆ng Tổng Bí thư Khul kơ dră chĕp kơ̆l Trung ương Đảng Cộng sản Trung Quốc, Kơ dră tĕh đak CHND Trung Hoa Tập Cận Bình.

TBT Nguyễn Phú Trọng păng ƀok Lưu Kiến Siêu (găh ‘ngieu) tơ̆ cham gre păr

‘Măng năm hơ pong đơ̆ng Tổng Bí thư Nguyễn Phú Trọng kiơ̆ nơ̆r krao hơ vơn đơ̆ng Tổng Bí thư, Kơ dră tĕh đak Trung Quốc Tập Cận Bình đei đơ̆ng rŏng kơ Hop akŏm bơ ngai tang măt lơ̆m tĕh đak ‘măng mă 20 kơ Đảng Cộng sản Trung Quốc đei pơ gơ̆r đang ‘lơ̆ng, khul kơ dră chĕp kơ̆l ‘nao hlôi đei roi tơ băt păng ƀok Tập Cận Bình đei pôk pơm dơ̆ng Tổng Bí thư jăl 3.

Hla kơ Việt Nam păr tơ̆ Cahm xă Thiên An Môn kŭm hăm Hla kơ Trung Quốc hơ iă kơ ‘măng năm hơ pong ngôi

Tơ drong Tổng Bí thư Nguyễn Phú Trọng jing kơ dră chĕp kơ̆l tĕh đak đe mă blŭng năm hơ pong tơ̆ Trung Quốc ăn ƀôh tơ drong gĭt kăl đơ̆ng tơ drong pơ vei Trung Quốc păng Việt Nam kŭm nhen đơ̆ng Đảng Cộng sản Trung Quốc păng Đảng Cộng sản Việt Nam. Tơ ƀôh hơ dăh trong jang ưh đei tơ plih đơ̆ng Việt Nam năng kăl tơ drong pơ vei hăm Trung Quốc ‘nŏh jĭ tơ drong pơ ‘nhŏ hơ drol hlŏh lơ̆m trong jang tơ bôl, hơ pơi ‘mĕh jang tŏk đunh đai, sơ đơ̆ng ‘lơ̆ng, roi đunh roi đei yoa.

Năr ‘nâu, 31/10, lêh sơng Tổng Bí thư Nguyễn Phú Trọng đei pơ gơ̆r tih tơ̆ Hnam hôp tih Kon pơ lei Bắc Kinh yoa Tổng Bí thư Khul kơ dră chĕp kơ̆l Trung ương Đảng Cộng sản Trung Quốc, Kơ dră tĕh đak CHND Trung Hoa Tập Cận Bình pơ gơ̆r. Đơ̆ng rŏng kơ lêh sơng, Tổng Bí thư 2 tĕh đak vă pơ gơ̆r pơ ma đam tih păng dơ̆ng lăng lơ lêh kĭ pơ kăp hla ar gĭt kăl.