Pơgê 29/11, tơ̆ Anih jang kơ Trung ương Đảng, Anih tơm Chinh trĭ, Ban Bí thư pơgơ̆r hop akŏm lơ̆m tĕh đak, pơgơ̆r kơtă hơdai hăm trư̆k tuyê̆n tơchĕng hơlen, hlôh vao tơlĕch jang kiơ̆ tơdrong tơchơ̆t kơ sô̆ 30-NQ/TW đơ̆ng Anih tơm Chinh trĭ jăl XIII găh trong jang atŏk tơiung muk drăm, tơpôl, vei sơđơ̆ng tĕh đak tơ̆ tơring tĕh glă Đak krong Hồng truh sơnăm 2030 trong vă jang truh sơnăm 2045. Tổng Bí thư Nguyễn Phú Trọng pơ gơ̆r păng đei ƀai iung pơ ma nơ̆r pơ tho tôch gĭt kăl lơ̆m hop akŏm.

‘Nâu jĭ hop akŏm hơmet pơkĕh tơdrong chih tơlĕch păng pơgơ̆r tơchĕng hơlen, hlôh vao, tơlĕch jang kiơ̆ dôm tơdrong Tơchơ̆t đơ̆ng Anih tơm Chinh trĭ jăl XIII hăm đĭ đăng 6 tơring jang mŭk drăm, tơpôl lơ̆m tĕh đak. Tơring tĕh glă Đak krong Hồng đei 11 dêh char, plt găh Trung ương. Lơ̆m jơhnơr arih rơbâu sơnăm tơiung pơjing păng vei lăng tĕh đak đơ̆ng hơdrĕch hơdrung, ‘nâu ling lang jing tơring tôch gĭt kăl kơ Anih tơm, jĭ tơring gĭt kăl hlŏh lơ̆m tĕh đak găh chinh trĭ, mŭk drăm, jŏh ayŏ kơ dŏ xoang, tơpôl, khul linh, vei sơđơ̆ng păng jang tơbôl. Tơdrong tơchơ̆t ‘nao gô tơgop pơm tơplih pran, tưk tơiung ‘lơ̆ng tơdrong jang tơplih ‘nao, atŏk tơiung mŭk drăm, tơpôl, vei lăng sơđơ̆ng tĕh đak tơ̆ tơring tĕh glă Đak krong Hồng păng lơ̆m tĕh đak lơ̆m khei ‘năr jang tŏk ‘nao.