VOV4.Bahnar - Pơgê năr 17/8, tơ̆ Hơnĭh bơ̆ jang Trung ương Đảng, Tổng Bí thư Nguyễn Phú Trọng, Kơdră Hơnĭh chĕp pơgơ̆r pơm tơm Hop akŏm ‘măng mă 22 kơ Dơnŏ anih chĕp pơgơ̆r Trung ương găh tang găn sa pơgơ̆m pơjĭp, pơm tơdrong glăi vă tơbrar, lăng hơlen pơtôch tơdrong jang 6 khei blŭng sơnăm, xơkơ̆t hơdăh tơdrong jang 6 khei hơtuch sơnăm 2022.

Tổng Bí thư Nguyễn Phú Trọng pơma hơdăh, akŏm chĕp pơgơ̆r, pơrô̆ hơnơ̆ng atŏk kơtang tơ iung pơjing, pơm keh đang trong bơ jang vă "hoei đei sa pơgơ̆m pơjĭp”. Găh tơdrong jang tơm bơ̆ jang sơnăm 2022, Dơnŏ anĭh chep pơgơ̆r athei rim kơdră chĕp pơgơ̆r hơnĭh đảng, hơnĭh bơ̆ jang đảng, hơnĭh bơ̆ jang ư̆h kơ gơ̆h pơhơi, lăp đon hăm dôm tơdrong jang hlôi đei jơnei; kăl kơ hret hlŏh dơ̆ng, hơdrin hlŏh dơ̆ng bơ̆ jang iung tơ jră phă pơrăm sa pơgơ̆m pơjĭp, pơm glăi au to; xek tơlang kơhret, hrơ̆p mĭnh ‘măng ƀar păh ki luơt đang, ki luơ̆t bơ̆ jang hăm dôm bơngai pơm glăi, mă đơ̆ng sư bơngai bu; tơtom pôk pơ ư, hôn bơnê, hơlêm rim hơnĭh bơ̆ jang, rim bơngai jang ‘lơ̆ng iung tơ jră tang găn sa pơgơ̆m pơjĭp, pơm glăi au to.

Tơblơ̆ nơ̆r: Amazưt