VOV4.Bahnar - Kơsơ̆ năr 10/3, tơ̆ Dơnŏ anĭh bơ̆ jang Trung ương Đảng, kơ yuơ Tổng Bí thư Nguyễn Phú Trọng pơm tơm, rim kơdră chĕp pơgơ̆r tơm dơnơm păng Kơdră chĕp pơgơ̆r Ban Bí thư hlôi hop akŏm, lăng hơlen dôm tơdrong kăl kơ tĕh đak, tơdrong lơ̆m plei tĕh lơ̆m 2 khei blŭng sơnăm 2022 păng tơdrong jang tơm lơ̆m khei năr kơnh. Rim kơdră chĕp pơgơ̆r tơm dơnơm sơkơ̆t hơdăh, khei năr kơnh tĕh đak bơ̆n rŏ năng hơnơ̆ng tơ jră mŭh măt hăm lơ tơdrong tơnap tap, tơdrong long ‘nao dơ̆ng, mă kăl tơdrong tơblăh vang hrang tơƀet tơ̆ Ukraine; tơdrong kơ jă tŏk jur ư̆h kơ tom băt, kơ jă tơmam drăm ming man, kơ jă đak xăng đak dau tŏk măt; tơdrong jĭ hơbŭh oei hơnơ̆ng kơtang. Pơma pơtôch hop akŏm, Tổng Bí thư Nguyễn Phú Trọng athei, rim hơnĭh bơ̆ jang hơnơ̆ng iung jang hơdoi ‘lơ̆ng hơ iă, pơrô̆ jang kiơ̆ rim tơdrong jang đei jơnei. Kiơ̆ kơ ‘nŏh, akŏm tơlĕch hrơ̆p mĭnh ‘măng rim trong jang tang găn jĭ hơbŭh Covid-19; jang kiơ̆ rim trong jang kơ Tơdrong jang hơmet pơ ‘lơ̆ng păng atŏk tơ iung mŭk drăm-tơpôl; dăr lăng kơ jăp tơdrong lơ̆m plei tĕh, sơđơ̆ng dơ̆ng kơ jăp grăng akau, mŭk drăm, tơdrong đei iŏk yua trŏ ƀlep ‘lơ̆ng hơ iă ăn kon pơlei; Hơnơ̆ng pơrô̆ kơtang hlŏh dơ̆ng bơ̆ jang tang găn sa pơgơ̆m pơjĭp, tơdrong ư̆h kơ ‘lơ̆ng hơ iă anai…

Tơblơ̆ nơ̆r: Amazưt