VOV4.Bahnar - Kơsơ̆ năr 15/4, tơ̆ Hơnĭh bơ̆ jang Trung ương Đảng, Tổng Bí thư Nguyễn Phú Trọng hlôi krao điên thoăi pơma dơnŭh hăm Thủ tướng Tĕh đak Cộng hòa Ấn Độ, Kơdră chĕp pơgơ̆r Đảng Kon pơlei Ấn Độ Narendra Modi. Tơ̆ pơma dơnŭh, Thủ tướng Narendra Modi sơkơ̆t hơdăh, Việt Nam ‘nŏh mĭnh tĕh đak kăl hlŏh lơ̆m trong bơ̆ jang tơbôl kơ Ấn Độ, mă kăl ‘nŏh trong bơ̆ jang “Iung jang lăng trŭh găh Hơlĕch”, pơma tơbăt jơhngơ̆m đon ‘lơ̆ng hơ iă hăm Tĕh đak păng kon pơlei Việt Nam.

Tổng Bí thư Nguyễn Phú Trọng sơkơ̆t hơdăh, tơdrong tơgoăt tơgoăl joăt joe Việt Nam - Ấn Độ đei rim jơhnơr kơdră kơpal păng kon pơlei ƀar tĕh đak hơmet pơ ‘lơ̆ng păng atŏk tơ iung; tơdrong tơgoăt kơ jăp ‘lơ̆ng găh chăl sơnăm păng erĭh sa, dôm tơdrong đei iŏk yua hơdoi lơ̆m lơ tơdrong apŭng plĕnh tĕh kăl pơm trong ăn tơgoăt tơgăl jang hơdoi păng tơgŭm djru dĭh băl iŏk đei jơnei. Găh Biển Đông, ƀar păh drơ̆ng mĭnh nơ̆r găh tơdrong kăl hlŏh kơ tơdrong vei kơ jăp rơngei hiôk hian, sơđơ̆ng, jang hơdoi, atŏk tơ iung păng yom kiơ̆ khôi luơ̆t apŭng plĕnh tĕh, lơ̆m au Tơdrong Pơkăp 1982 kơ Liên Hợp Quốc găh Khôi luơ̆t Đak dơsĭ, yom kiơ̆ pơm tơm kơdĭh, tơdrong pơm tơm kơ rim tĕh đak păng tơdrong yak vĭh vơ̆t hiôk hian kơ gre păr, duk.

Tơblơ̆ nơ̆r: Amazưt