VOV4.Bahnar - Năr brei, năr 27/6, ƀlep lơ̆m năr tơbăt 71 sơnăm Năr pơjing Đảng kon pơlei Campuchia (CPP), Tơbăt 55 sơnăm năr pơjing tơbôl Việt Nam-Campuchia, Tổng Bí thư Nguyễn Phú Trọng hlôi pơma dơnŭh păng điên thoăi hăm Kơdră chĕp pơgơ̆r Đảng Kon pơlei Campuchia, Thủ tướng Tĕh đak Campuchia Hun Sen.

Tơ̆ jơ pơma dơnŭh păng điên thoăi, ƀar ‘nu kơdră chĕp pơgơ̆r hlôi tơroi tơbăt dĭh băl dôm tơdrong jang kơ Đảng, kơ tĕh đak kơ dĭh, tơbăt jơhngơ̆m đon chơt hơ iă găh tơdrong tơgoăt tơgoăl jang hơdoi Việt Nam - Campuchia hơnơ̆ng hơmet pơ ‘lơ̆ng păng atŏk tơ iung kơtang, hơnhăk đei jơnei hơ iă ăn kon pơlei ƀar tĕh đak. Ƀar ‘nu kơdră chĕp pơgơ̆r sơkơ̆t hơdăh atŭm dĭh băl vei kơ jăp, hơmet pơ ‘lơ̆ng tơgoăt tơgoăl dĭh băl ‘lơ̆ng hơ iă păng drơ̆ng mĭnh nơ̆r hơnơ̆ng iung jang hơdoi kơ jăp, pơtrŭt kơtang jang hơdoi kiơ̆ trong mă ƀar păh hlôi tơlĕch. Tổng Bí thư Nguyễn Phú Trọng lui kơ jăp, hăm trong chĕp pơgơ̆r gơ̆h hơgei đơ̆ng ƀok pơtao Nô-rô-đôm Xi-ha-mô-ni, trong pơrô̆ jang đơ̆ng Thượng viện, Kuô̆k hô̆i, Khŭl kơdră chĕp pơgơ̆r Campuchia hăm hơnăp jang gĭt kăl ‘nŏh Đảng CPP kơ yuơ Kơdră chĕp pơgơ̆r CPP, Thủ tướng Hun Sen chĕp kơ̆l, kon pơlei Campuchia gô hơnơ̆ng iŏk đei lơ tơdrong jơnei hle, tĭh tên hlŏh dơ̆ng lơ̆m bơ̆ jang vei lăng, tơ iung pơjing păng atŏk tơ iung tĕh đak.

Tơblơ̆ nơ̆r: Amazưt