Pơgê 3/1, pơgơ̆r hop akŏm trư̆k tuyê̆n đơ̆ng Khul kơdră tĕh đak hăm dôm tơring pơtôch tơdrong jang sơnăm 2022 păng tơlĕch Nơ̆r Tơchơ̆t đơ̆ng Trung ương, Tơdrong tơchơ̆t đơ̆ng Kuô̆k hô̆i jăl 15 găh trong jang atŏk tơiung mŭk drăm, tơpôl sơnăm 2023.

Pơma tơ̆ hop akŏm, Tổng Bí thư Nguyễn Phú Trọng pơma hơdăh, Khul kơdră tĕh đak păng dôm Anih tơm, anih jang kơpal, tơring tơrang athei năng kăl, hơnơ̆ng hơmet pơ ‘lơ̆ng trong chĕp kơ̆l pơgơ̆r, hơmet ming anih tơmât jên jang, tĕch mơdro, mong akŏm păng iŏk yoa jên mă lăp, tơgĕch iŏk tơdrong ‘lơ̆ng vă jang tŏk ming dơ̆ng, jang tŏk mŭk drăm, tơpôl hrĕnh păng kơjăp ƀiơ̆.

Tổng Bí thư Nguyễn Phú Trọng akhan, sơnăm 2022 Khul kơdră tĕh đak hlôi adrin jang đei lơ tơdrong jơnei păng iŏk đei lơ tơdrong ‘lơ̆ng ƀiơ̆ kơ sơnăm 2021 lăp hăm tơdrong hơpơi ‘mĕh đơ̆ng Tổng Bí thư lơ̆m ƀai iung pơma nơ̆r pơtho tơ̆ hop akŏm sơnăm sơ̆. Hơ iă loi jĭ, mŭk drăm tĕh đak bơ̆n oei tŏk hrĕnh, iŏk đei 8,02%, lơ hlŏh nơ̆r hơgăt đơ̆ng 6 - 6,5%, lơ hlŏh pơtêng hăm dôm tĕh đak tơ̆ tơring păng lơ̆m apŭng plenh tĕh.

Tổng Bí thư Nguyễn Phú Trọng pơma hơdăh dơ̆ng 5 tơdrong tih, tơƀôh trong vă hop akŏm pơma nuh, lơ̆m nŏh Khul kơdră tĕh đak athei năng kăl, hơmet pơ ‘lơ̆ng, hơ tŏk hlŏh dơ̆ng tơdrong jang mŭk drăm lơ̆m tĕh đak, tang găn kơjă tơmam tŏk, hơtŏk jơhngâm pran lơ̆m tĕh đak păng đon kơchăng kơdih đơ̆ng anih jang mŭk drăm.