Anih pơgơ̆r jang akhan, lơ̆m sơnăm 2022 dôm anih tơ kêng kơ Trung ương kơchăng chă ƀôh, bơ̆ jang tôch pran, tơ kêng lơ tơdrong yoch xa pơjĭp, pơm glăi tih, hơmơt tơt, tôch krê. Tổng Bí thư Nguyễn Phú Trọng athei, tơ̆ hơnăp kơnh, dôm anih jang kơpal hơnơ̆ng jang hơdoi hăm băl mă ‘lơ̆ng, mă lăp, pơjing đei trong pơgơ̆r jang, tơdrong tơgŭm, nơ̆r hơgăt kơjăp ‘lơ̆ng vă đe ưh pơ̆n, ưh gơ̆h, ưh ‘mĕh, ưh kăl xa pơjĭp, veh ver tơdrong hli mưh bơ̆ jang, hli pơm glăi, ưh pơ̆n jang.

Tổng Bí thư Nguyễn Phú Trọng oei pơma hơ dăh, athei đei trong jang gĭt kăl, kăn ƀô̆ chĕp kơ̆l, vei lăng jơ̆p tơring, jang roi tih athei jang roi tơnăp, băt vei lăng kơ dih kâu mă ‘lơ̆ng. Dôm bơngai jang lơ̆m Anih pơgơ̆r jang kơ Trung ương găh tang găn xa pơjĭp, pơm glăi athei đei đon tơnăp, năm hơdrol lơ̆m tơdrong jang tang găn xa pơjĭp, pơm glăi.