VOV4.Bahnar - Ƀlep lơ̆m năr Têt Bun Pi May kơ Lào păng Têt Chôl Chnam Thmay kơ Campuchia, Tổng Bí thư Dơnŏ anĭh chĕp pơgơ̆r Trung ương Đảng Cộng sản Việt Nam Nguyễn Phú Trọng hlôi pơtrŭh kơthơ păng gơvang pơkao hmach chơt hơ iă ăn kơ ƀok Thoong-lun Xỉ-xu-lít, Tổng Bí thư Dơnŏ anĭh chĕp pơgơ̆r Trung ương Đảng Kon pơlei kĕch mang Lào, Kơdră chĕp pơgơ̆r tĕh đak Cộng hòa dân chủ nhân dân Lào păng ƀok Hun Sen, Kơdră chĕp pơgơ̆r Đảng Kon pơlei Campuchia, Thủ tướng tĕh đak Campuchia.  Nơ̆r chĭh lơ̆m Kơthơ hmach chơt hơ iă đơ̆ng Tổng Bí thư Nguyễn Phú Trọng pơma tơbăt jơhngơ̆m đon:  Đảng, Tĕh đak păng kon pơlei Việt Nam tôch chơt hơ iă găh tơdrong tơgoăt tơgoăl gĭt kăl păng jang hơdoi tôm tong Việt Nam – Lào roi năr roi atŏk tơ iung, kơtang, tơpă păng jơnei lơ̆m rim tơdrong. Ƀlep lơ̆m năr Têt joăt joe kơ Kon pơlei Campuchia, tang măt ăn kơ Đảng, tĕh đak păng Kon pơlei Việt Nam, Tổng bí thư Nguyễn Phú Trọng pơtrŭh ăn ƀok Hun Sen hăm rim Kơdră chĕp pơgơ̆r Đảng Kon pơlei Campuchia, tĕh đak păng pơ đĭ kon pơlei Campuchia jơhngơ̆m đon tơgoăt tơgoăl ‘lơ̆ng hơ iă hlŏh păng hmach chơt hơ iă sơnăm ‘nao pran jăng grăng akau, hơnŭk hơnoa, sơđơ̆ng păng pơdrŏng.

Tơblơ̆ nơ̆r: Amazưt