VOV4.Bahnar - ‘Năr 13/9, tơ̆ Anih bơ̆ jang Trung ương Đảng, Tổng Bí thư Nguyễn Phú Trọng hlôi sơng Kơ dră chĕp kơ̆l Đảng Kon pơ lei Campuchia (CPP), Kơ dră Kuôk hô̆i teh đak Campuchia  Samdech Heng Samrin tŏk bŏk đei ‘măng năm ngôi tơ̆ Việt Nam. Tơ̆ jơ sơng, Tổng Bí thư Nguyễn Phú Trọng  pơ ma hơ dăh tơ drong pơ vei jang hơ dai đơ̆ng 2 Đảng, 2 teh đak păng kon pơ lei 2 teh đak roi ‘năr roi hơ tŏk tơ iung ‘lơ̆ng, hơ iă păng đei iŏk yua, hơ nhăk ăn đei yua ‘lơ̆ng ăn kon pơ lei 2 teh đak.

Tổng Bí thư Nguyễn Phú Trọng pơ ma hơ dăh Đảng, teh đak păng kon pơ lei Việt Nam ling lang tơ gŭm tơ drong jang pơ jing păng hơ tŏk tơ iung teh đak Campuchia, bơ nê tơ drong tơ gŭm kăp gĭt mă Campuchia hlôi ‘măn ăn kơ Việt Nam đơ̆ng sơ̆ khơ̆ dang ei. Tổng Bí thư pơ ma hơ dăh tơ drong joăt joe păng tơ drong gĭt kăl đơ̆ng tơ drong pơ vei đơ̆ng 3 teh đak Việt Nam-Lào- Campuchia păng ‘meh vă 3 teh đak vang hơ dai băl vei lăng, tưk tơ iung ăn tơ drong pơ vei đơ̆ng 3 teh đak roi ‘năr roi hơ tŏk tơ iung, yua kơ tơ drong hơ nŭk hơ noa kơ rim teh đak, yua kơ tơ drong rơ ngei, sơ đơ̆ng, jang hơ dai păng hơ tŏk tơ iung tơ̆ tơ ring păng apŭng plĕnh teh.

Thuem: Tơ blơ̆