Ƀok Say Chhum tơ ƀôh đon hơ iă đei năm hơ pong ngôi tơ̆ Việt Nam lơ̆m sơ năm tơ bôl Việt Nam - Campuchia, bơ nê Tổng Bí thư Nguyễn Phú Trọng hlôi sơng păng ‘măn ăn khul lơ tơ drong ‘lơ̆ng hơ iă. Ƀok pơ ma hơ dăh, Campuchia kŭm hăm Việt Nam khŏm vei kơ jăp, pơm hơ tŏk păng chĕp vei kơ jăp ăn rim jơ hnơr đơ̆ng rŏng tơ drong pơ vei ‘lơ̆ng hơ iă âu kŭm nhen tơ drong pơ vei đơ̆ng 3 Đảng, 3 tĕh đak Campuchia - Việt Nam - Lào. Ƀok Say Chhum roi tơ băt ăn Tổng Bí thư Nguyễn Phú Trọng găh dôm tơ drong iŏk đei đơ̆ng pơ ma đam hăm Kơ dră Kuô̆k hô̆i Vương Đình Huệ, tơ drong tơ̆ Campuchia tơ jê̆ âu. 

Tổng Bí thư Nguyễn Phú Trọng  sơng Kơ dră Thượng viện tĕh đak Campuchia Say Chhum

Tổng Bí thư Nguyễn Phú Trọng tơ chĕng ‘lơ̆ng păng lăp đon hăm ‘măng năm hơ pong đơ̆ng ƀok Say Chhum, pơ ma hơ dăh, tơ drong pơ vei đơ̆ng 2 tĕh đak kŭm nhen đơ̆ng 3 tĕh đak Việt Nam - Lào - Campuchia vang tơ gop gĭt kăl tơ gŭm ăn rim tĕh đak jang tŏk hơ nŭk hơ noa, kon pơ lei đei tơ drong arih xa phĭ tơ nŏ, hiôk chơt. Ƀok Tổng Bí thư pơ ma găh dôm trong jang tih vă pơm hơ tŏk tơ drong pơ vei 2 tĕh đak tơ̆ hơ năp, mă loi jĭ trong pơ gơ̆r tơ ƀâp tih đơ̆ng 2 Đảng, Khul kơ dră tĕh đak, Kuô̆k hô̆i, dôm anih tơm, anih jang kơ pal, khul grŭp, tơ ring tơ rang păng pơ tho pơ hrăm, roi tơ ƀôh ăn jơ hnơr mơ lôh găh tơ drong pơ vei ‘lơ̆ng hơ iă đơ̆ng sơ̆ kơ Việt Nam -–Campuchia.