VOV4.Bahnar - Kơ sơ̆ ‘năr 28/4, tơ̆ Anih bơ̆ jang Trung ương Đảng, Tổng Bí thư Nguyễn Phú Trọng hlôi sơng Khŭl tang măt gĭt kăl kơ Teh đak Lào yua đơ̆ng yă Pany Yathotou, Phŏ kơ dră teh đak năm tơ mang tơ̆ Việt Nam. Tổng Bí thư Nguyễn Phú Trọng lăng ‘lơ̆ng ‘măng năm tơ mang tơ ƀôh ‘lơ̆ng hơ iă tơ drong pơ vei gĭt kăl lui ngeh Việt Nam-Lào; pơ ma hơ dăh tơ drong gĭt kăl đơ̆ng tơ drong ưh kơ pơ dơh hơ met ming păng hơ tŏk loi dơ̆ng tơ drong pơ vei Việt Nam - Lào hăm tơ drong sơ đơ̆ng păng hơ tŏk tơ iung tơ̆ 2 teh đak kŭm nhen hăm tơ drong rơ ngei, jang hơ dai păng hơ tŏk tơ iung lơ̆m tơ ring păng apŭng plĕnh teh. Tổng Bí thư Nguyễn Phú Trọng hôn bơ nê pơ tôch ‘măng pơ ma đam đơ̆ng 2 Phŏ kơ dră teh đak; athei 2 păh hơ drin, kơ chăng tơ lĕch jang kiơ̆ đei yua dôm tơ drong drơ̆ng nơ̆r đơ̆ng kơ dră chĕp kơ̆l gĭt kăl 2 Đảng, 2 teh đak, lơ̆m noh hơ nơ̆ng hơ nhăk tơ drong pơ vei chĭnh trĭ roi ‘lơ̆ng hloh, jang hơ dai kơ jăp găh khul linh, vei sơ đơ̆ng păng jang tơ bôl, pơ trŭt hơ tŏk ‘lơ̆ng đei yua jang hơ dai găh mŭk drăm, joh ayŏ, pơ tho pơ hrăm,....

Thuem: Tơ blơ̆