VOV4.Bahnar - Kơsơ̆ năr 18/7, Tổng bí thư Nguyễn Phú Trọng sơng pơma dơnŭh hăm Khŭl kơdră kơpal kơ Đảng, tĕh đak Lào kơ yuơ ƀok Bonthong Chithmany, Kơdră jang lơ̆m Dơnŏ anĭh tơm Chĭnh trĭ, Kơdră Ban Bí thư, Kơ iĕng Kơdră chĕp pơgơ̆r Tĕh đak Lào pơm tơm khŭl iung năm tơmang Việt Nam păng vang Pơm lêh tơbăt 60 sơnăm Năr pơjing tơbôl, 45 sơnăm Năr kĭ pơkăp Tơdrong tơchơ̆t Tơgoăt tơgoăl gĭt kăl păng jang hơdoi Việt Nam-Lào.

Rup jơ tơƀơ̆p

Tổng Bí thư Nguyễn Phú Trọng hăm ƀok Bonthong Chithmany pơma tơbăt jơhngơ̆m đon chơt hơ iă găh tơdrong jang hơdoi ‘lơ̆ng liĕm lơ̆m rim tơdrong ƀar păh ƀar Đảng, ƀar Tĕh đak lơ̆m khei năr au ki; sơkơ̆t hơdăh mă đơ̆ng lơ̆m khei ‘năr ayơ, ƀar păh jei vang kơrŭn, mĭnh jơhngơ̆m đon vei kơ jăp vă tơdrong tơgoăt tơgoăl ling lang kơ jăp Việt Nam - Lào, Lào - Việt Nam ling lang kơ jăp iăp kơtang, hơnhăk đei tơdrong iŏk yua hơ iă ăn kon pơlei ƀar tĕh đak. Ƀar păh vang iung jang hơdoi kơ jăp lơ̆m tơdrong tơlĕch jang kiơ̆ jơnei rim tơdrong drơ̆ng mĭnh nơ̆r ƀar păh kơdră chĕp pơgơ̆r ƀar đảng, ƀar tĕh đak; atŏk kơtang năm ngôi dĭh băl, tơbăt dĭh băl tơdrong jang ‘lơ̆ng hơ iă lơ̆m pơchŏh trong bơ̆ jang păng tơlĕch jang kiơ̆ tơdrong jang tơ iung pơjing păng atŏk tơ iung tĕh đak.

Tơblơ̆ nơ̆r: Amazưt