Kơsơ̆ năr 13/11, Tổng Bí thư Nguyễn Phú Trọng sơng pơma dơnŭh hăm Thủ tướng Olaf Scholz ƀlep lơ̆m Thủ tướng Đức năm tơmang Việt Nam. Tổng Bí thư Nguyễn Phú Trọng hôn bơnê kơtang pơtôch ‘lơ̆ng liĕm ‘măng pơma đam ƀar păh Thủ tướng Đức hăm Thủ tướng Phạm Minh Chính, hôn bơnê rim tơdrong drơ̆ng mĭnh nơ̆r jang hơdoi mă rim hơnĭh tơm, hơnĭh bơ̆ jang ƀar păh hlôi kĭ pơkăp; sơkơ̆t hơdăh Việt Nam lăng kơ jăp tơdrong pơvei Jang hơdoi Gĭt kăl hăm Đức.

Tổng Bí thư pơma dơnŭh hăm Thủ tướng Đức mĭnh ƀar trong jang tĭh vă atŏk kơtang jang hơdoi rim tơring, pơtrŭt kơtang tơgoăt tơgoăl ƀar păh atŏk tơ iung ‘lơ̆ng, hơnhăk tơgoăt tơgoăl ƀar tĕh đak ‘lơ̆ng rŏ hlŏh dơ̆ng tơgăl hăm tơdrong ‘mĕh vă păng dôm tơdrong mă ƀar păh đei. Hmach chơt hơ iă dôm tơdrong iŏk đei jơnei hơ iă kơ Việt Nam lơ̆m atŏk tơ iung tĕh đak, Thủ tướng Đức sơkơ̆t hơdăh Đức lăng kơ jăp tơgoăt tơgoăl jang hơdoi gĭt kăl Đức - Việt Nam, adoi nhen lăng kơ jăp hơnăp jang, hơnĭh dơ̆ng lơ̆m apŭng plĕnh tĕh kơ Việt Nam, lơm au hơnăp jang kơ Việt Nam tơ̆ ASEAN.