Tổng Bí thư Nguyễn Phú Trọng hmach chơt hơ iă hăm ƀok Chăn-xa-mỏn Chăn-nha-lạt pơm tơm Khŭl kơdră kơpal tang măt ăn Khul lĭnh Lào năm tơmang Việt Nam; hôn bơnê kơtang tơdrong joăt joe, tơdrong jang hơdoi jơnei kơ khul lĭnh ƀar teh đak sơ̆ adoi nhen dang ei, pơtôch ‘măng pơma đam ƀar păh Yŏng Khŭl lĭnh vei lăng sơlam teh đak.

Tổng Bí thư athei Khul lĭnh vei lăng sơlam ƀar teh đak hơnơ̆ng jang kiơ̆ kơ jăp tơdrong joăt joe đơ̆ng sơ̆ kơ ƀar păh, iung jang jơnei rim tơdrong jang chĭnh trĭ đei pơjao, iung jang hơdoi kơjăo tơlĕch jang kiơ̆ jơnei Tơdrong Tơchơ̆t păng Trong iung jang, Trong vă jang hơdoi ƀar păh Khul lĭnh vei lăng sơlam teh đak, hơnơ̆ng pơrô̆ tơbăt kơtang chăl sơnăm gĭt kăl sơ̆ ki, tơdrong tơgoăt tơgoăl gĭt kăl Việt Nam-Lào lơ̆m pơđĭ khul lĭnh. Tổng Bí thư bơnê kơ Lào hlôi tơgŭm djru tih tên ăn Việt Nam đơ̆ng sơ̆ trŭh dang ei, lơ̆m au đei tơdrong tơgoăt tơgoăl dĭh băl kơjăp, tơgŭm djru đơ̆ng khul lĭnh Lào; sơkơ̆t hơdăh tơdrong gĭt kăl kơ tơgoăt tơgoăl jang hơdoi Việt Nam – Lào ư̆h khan lăp ƀar teh đak tơjê̆ mă lei oei jing ‘nhŏng ŏh, bôl boăl tơklep kơjăp lơ̆m tơdrong iung tơblăh pơm rơngei hơdrĕch hơdrung, teh đak rơngei keh kong adoi nhen lơ̆m ‘măng tơ iung pơjing păng vei lăng teh đak hrei au.