VOV4.Bahnar - Kơ sơ̆ 29/9, tơ̆ Anih jang kơ Trung ương Đảng, Tổng Bí thư Nguyễn Phú Trọng sơng pơ ma nuh chơt hơ iă hăm ƀok Manuel Marrero Cruz, Kơ dră jang lơ̆m Anih tơm Chinh trĭ Đảng Cộng sản Cuba, Thủ tướng tĕh đak Cộng hòa Cuba ƀlep ƀât ‘măng năm hơ pong ngôi tơ̆ Việt Nam. Tơ̆ jơ sơng, ƀok Tổng Bí thư Nguyễn Phú Trọng pơ ma hơ dăh Đảng, Tĕh đak păng kon pơ lei Việt Nam ling lang năng kăl păng băt bơ nê tơ drong tơ gŭm đơ̆ng Đảng, Tĕh đak păng kon pơ lei Cuba hăm tơ drong iung tơ blăh iŏk rơ ngei ăn hơ drĕch hơ drung păng pơ jing tĕh đak đơ̆ng Việt Nam.

Tổng Bí thư Nguyễn Phú Trọng hăm Thủ tướng tĕh đak Cuba

Tổng Bí thư lui hăm tơ drong chĕp kơ̆l pơ gơ̆r đơ̆ng Đảng Cộng sản Cuba gơh hơ gei, kon pơ lei Cuba gô jang đei tơ drong jang mŭk drăm tơ pôl kiơ̆ trong xã hội chủ nghĩa păng đon pơ hnŏng pơ jing tĕh đak pơm tơm kơ dih, rơ ngei hiôk hian, xã hội chủ nghĩa, kon pơ lei pơm tơm, hơ nŭk hơ noa păng kơ jăp ‘lơ̆ng. Tổng Bí thư Nguyễn Phú Trọng athei 2 păh hơ tŏk tơ drong jang hơ doi păng adrin tơ lĕch jang hrơ̆ch ‘lơ̆ng tơ drong pơ vei pơ đĭ 3 trong đei, jang tơ bôl kơ Đảng, Jang tơ bôl kơ Tĕh đak păng jang tơ bôl kon pơ lei, bơ̆ jang đei yoa dôm tơ drong drơ̆ng nơ̆r jang hơ doi, vang tơ gŭm ăn băl.

VOV-Dơ̆ng tơ blơ̆