VOV4.Bahnar - Kơ sơ̆ 21/3 tơ̆ Anih jang kơ Trung ương Đảng, Tổng Bí thư Nguyễn Phú Trọng sơng ƀok Dato’ Sri Ismail Sabri bin Yaakob, Thủ tướng tĕh đak Malaysia, truh tơ ƀâp lơ̆m jơ năr năm hơ pong tơ̆ Việt Nam.

Thủ tướng Malaysia tơ roi ăn Tổng Bí thư găh tơ drong pơ ma đam hăm Thủ tướng Phạm Minh Chính, pơ ma hơ dăh Malaysia năng kăl tơ drong pơ vei jang hơ doi gĭt kăl hăm Việt Nam, hơ pơi ‘mĕh 2 păh hơ tŏk loi dơ̆ng tơ drong jang hơ doi 2 pang găh mŭk drăm, tĕch mơ dro, tơ mât jên jang păng pơ gơ̆r ăn kon pơ lei chă tơ ƀâp băl, tơ ƀôh đon ‘mĕh jang hơ doi găh tơ mang lăng păng jang hơ doi tơ̆ đak dơ sĭ hăm Việt Nam vă iŏk yoa ‘lơ̆ng dôm tơ drong pran đơ̆ng 2 tĕh đak.

Tổng Bí thư Nguyễn Phú Trọng oei pơ ma nuh hăm Thủ tướng Malaysia găh tơ drong jơ nei đơ̆ng jang mŭk drăm, tơ pôl kơ Việt Nam, pơ ma hơ dăh trong jang ưh đei tơ plih đơ̆ng Việt Nam năng kăl păng ‘mĕh pơm hơ tŏk hlŏh dơ̆ng tơ drong pơ vei jang hơ doi gĭt kăl hăm Malaysia, athei 2 păh tưk tơ iung dôm nơ̆r pơ kăp hlôi jang đei, pơm hơ tŏk tơ drong đei yoa đơ̆ng jang hơ doi, lơ̆m nŏh đei hơ tŏk tơ drong jang hơ doi đơ̆ng dôm đảng tơm, hơ tŏk tơ drong jang hơ doi 2 pang kŭm nhen lơ̆m ASEAN păng dôm khul grŭp nai tơ̆ tơ ring păng lơ̆m apŭng plenh tĕh.

Dơ̆ng: Tơ blơ̆