VOV4.Bahnar - Bơ̆ jang kiơ̆ tơ drong pơ gơ̆r tơ ƀâp bơ ngai tăh hla adrol kơ hop akŏm mă 3 Kuô̆k hô̆i jăl 15, pơ gê 12/5, Tổng Bí thư Nguyễn Phú Trọng kŭm hăm dôm bơ ngai lơ̆m Khul tang măt Kuô̆k hô̆i plt Hà Nội, anih pôk rơih kơ sô̆ 1, pơ gơ̆r tơ ƀâp bơ ngai tăh hla tơ̆ dôm kuơ̆n Đống Đa, Ba Đình, Hai Bà Trưng kiơ̆ trong trư̆k tuyê̆n hơ dai hăm pơ gơ̆r tơ păt tơ̆ yăn âu.

Tổng Bí thư Nguyễn Phú Trọng tơl nơ̆r apinh ăn bơ ngai tăh hla

Dơ̆ng tang ăn dôm bơ ngai tang măt Kuô̆k hô̆i anih pôk rơih kơ sô̆ 1, Tổng Bí thư Nguyễn Phú Trọng chĕp răk dôm nơ̆r pơ ma tơ păt ‘lơ̆ng, trŏ tơ drong, tôch rơ đăh păng tôch tơ năp đơ̆ng bơ ngai tăh hla, tơ gop ‘lơ̆ng ăn tơ drong jang đơ̆ng Khul tang măt Kuô̆k hô̆i plt Hà Nội păng Kuô̆k hô̆i jăl 15.

Pơ ma truh tơ dỏng tang găn xa pơ jĭp, Tổng Bí thư Nguyễn Phú Trọng ăn tơ băt, tơ̆ hop akŏm Trung ương 5 ‘nao tôch brei drou, Trung ương drơ̆ng nơ̆r pơ jing Anih pơ gơ̆r jang kơ dêh char găh tang găn xa pơ jĭp vă hơ nơ̆ng tưk tơ iung dôm tơ drong jang đei lơ̆m 10 sơ năm âu ki, pơ jing trong drơ̆ng 1 nơ̆r tơ̆ jơ̆p 63 dêh char, plt lơ̆m tĕh đak, vang tơ gop tang găn, chă ƀôh dôm bơ ngai đei jơ hngâm đon ưh tơ păt ‘lơ̆ng, jing đei xa pơ jĭp, pơm glăi, pơ huach kư̆ kă.

Dơ̆ng: Tơ blơ̆