Pơma tơ̆ hop akŏm, Tổng Bí thư Nguyễn Phú Trọng tơchĕng ‘lơ̆ng tơdrong adrin đơ̆ng đĭ đăng khul linh lơ̆m sơnăm 2022 tơgop kŭm hăm đĭ đăng Đảng, đĭ đăng kon pơlei păng rim anih jang chinh trĭ, jang tơiung ming dơ̆ng mŭk drăm; tang găn xa pơjĭp, tơdrong glăi; vei sơđơ̆ng tĕh đak, jang tơbôl roi tŏk ‘lơ̆ng, hơnăp jang, anih dơ̆ng đơ̆ng tĕh đak bơ̆n roi kơjung.

Đơ̆ng rŏng kơ tơblang hơdăh rim tơdrong lơ̆m apŭng plenh tĕh, tơ̆ tơring, tơdra adrol oei đei lơ tơdrong krê, ưh gơ̆h băt hơdrol, Tổng Bí thư Nguyễn Phú Trọng athei, tơ̆ hơnăp kơnh, đĭ đăng khul linh athei kơchăng, hơbĕch hơbal, hơtŏk jơhngâm tơchĕng hơlen, tơdra hơdrol, bơ̆ jang ‘lơ̆ng hơnăp jang roi tơƀôh hăm Đảng păng tĕh đak găh khul linh, vei sơđơ̆ng tĕh đak; đei trong jang lăp ‘lơ̆ng, đei yoa hăm rim tơdrong, ưh gơ̆h lê̆ đei tơdrong ưh kơ ê.

Kơchăng roi tơƀôh, sek tơlang rơgei ‘lơ̆ng, đei yoa lơ̆m tơdrong pơvei hăm apŭng plenh tĕh; dôm trong jang tang găn ưh ăn đei tơblăh vang đơ̆ng blŭng, đơ̆ng hơtăih; dôm tơdrong tơ̆ tơring sơlam, đak dơsĭ, achon kông tơ̆ đak dơsĭ. Găh nŏh dơ̆ng, hơnơ̆ng chĕp vei, hlôh vao kơjăp tơdrong jang đĭ đăng kon pơlei vang vei sơđơ̆ng tĕh đak, trong tơblăh, vei lăng tĕh đak lơ̆m chăl hle.