Kơsơ̆ 13/12, tơ̆ Anih jang kơ Trung ương Đảng, Tổng Bí thư Nguyễn Phú Trọng sơng pơma nuh hăm Khul tang măt Anih roi tơbăt, pơtho tơƀôh kơ Trung ương Đảng Kon pơlei kăch mang Lào yoa ƀok Khăm-phăn Phởi-nhạ-vông, Bí thư Trung ương, Kơdră Anih roi tơbăt, pơtho tơƀôh kơ Trung ương, Kơdră Khul Tơblang hơdăh kơ Trung ương chĕp kơ̆l, oei hơpong, bơ̆ jang tơ̆ Việt Nam. 

Pơma tơ̆ jơ sơng, Tổng Bí thư Nguyễn Phú Trọng pơma hơdăh Đảng, tĕh đak, kon pơlei Việt Nam hơnơ̆ng năng kăl tơdrong pơvei tôch gĭt kăl, mĭnh jơhngâm đon, jĭ boăl juăt hai, ‘nhŏng ŏh hai, hơnơ̆ng năm hơdoi lơ̆m tơdrong tơblăh iŏk rơngei adrol sơ̆ kŭm nhen lơ̆m tơdrong tơiung pơjing păng vei lăng tĕh đak hrei ‘nâu.

Ƀok Tổng Bí thư kơchĕng ‘lơ̆ng tơdrong iŏk đei đơ̆ng jang hơdoi kơ 2 Anih roi tơbăt kŭm nhen tơdrong iŏk đei đơ̆ng pơma đam, hlôi tơgop gĭt kăl hơmet kơjăp păng hơtŏk tơdrong pơvei kơjăp ‘lơ̆ng đơ̆ng Việt Nam - Lào, atŭm hăm ‘nŏh athei tơ̆ hơnăp kơnh, 2 păh hơnơ̆ng tưk tơiung tơdrong juăt đơ̆ng kơdih, bơ̆ jang đei jơnei dôm tơdrong jang chinh trĭ đei pơjao, jang hơdoi mă kơjăp, tơlĕch jang đei yoa ‘lơ̆ng Tơdrong drơ̆ng nơ̆r đơ̆ng kơdră chĕp kơ̆l 2 Đảng, 2 tĕh đak păng Tơdrong drơ̆ng nơ̆r jang hơdoi đơ̆ng 2 Anih roi tơbăt kơ Trung ương.