Tơbăt 80 sơnăm năr pơjing Khul Ƀô̆ đô̆i kon pơlei Việt Nam, 35 sơnăm Năr đĭ đăng kon pơlei vang vei lăng Teh đak, kơsơ̆ năr 18/12, tơ̆ hnam hop akŏm Hơnih tơm Ƀô̆ đô̆i, Tổng Bí thư Tô Lâm, Bí thư Quân uỷ Trung ương vang năm păng pơm tơm jơ tơƀơ̆p muh măt, hơlêm jơhnơr mơlôh lơ̆m khul ƀô̆ đô̆i. Pơma dơnuh hăm rim bơngai tang măt hơdruh tơdăm khul ƀô̆ đô̆i gơh hơgei, Tổng Bí thư Tô Lâm sơkơ̆t hơdăh, lơ̆m prăt 80 sơnăm ou ki, rim jơhnơr hơdruh tơdăm ƀô̆ đô̆i ling lang kơrŭn đĭ jơhngơ̆m đon hơgei, nuih mơng pran kơtang, đĭ jơhngơ̆m iung jang ăn teh đak, vei lăng kon pơlei, ưh kơ dŭn tơ̆ rŏng tơ̆ hơnăp tơdrong hli hlơt, plang hơkou jăn yak năm tơ̆ hơnăp, iung jang tôm tơdrong yă kiơ mă Teh đak păng Kon pơlei ‘meh vă. Pơma hơdăh, teh đak bơ̆n tŏk bŏk dơ̆ng tơ̆ hơnăp dôm tơdrong rơvơn chăl ‘nao, Chăl atŏk tơ iung, pơdrŏng pran kơtang; Tổng Bí thư akhan, dôm tơdrong hơpơi ‘noh gô mơ̆ng kiơ̆ tih tên lơ̆m khul hơdruh tơdăm, lơ̆m ou đei hơdruh tơdăm khul Ƀô̆ đô̆i đei hơnăp jang kăl hloh, tơm hloh, yak trong hơlou. Đảng, Teh đak păng kon pơlei tŏk bŏk gô chang gơnang yoa lơ̆m tơdrong kơrŭn đĭ ai atŏk tơ iung “kĕ yak hloh tơdrong bơ̆n đei” đơ̆ng hơdruh tơdăm khul Ƀô̆ đô̆i.