Đơ̆ng rŏng mơ̆ng nơ̆r tơroi đơ̆ng Anih tơm vei lăng jang kơmăy, tĕch mơdro păng dôm nơ̆r pơma đơ̆ng dôm bơngai tang măt vang truh hop akŏm, ƀok Tổng Bí thư athei Anih tơm vei lăng jang kơmăy, tĕch mơdro hơnơ̆ng tơchĕng hơlen, chih răk mă tôm nơ̆r pơma tơ̆ hop akŏm, jăh tơlĕch trong hơlen năng păng tơroi ăn Anih tơm jang Chinh trĭ, Khul kơdră chĕp kơ̆l Trung ương Đảng dôm tơdrong oei tam mă ‘lơ̆ng lơ̆m tơdrong pơvei jang mŭk drăm – tĕch mơdro đơ̆ng bơ̆n hăm dôm teh đak jang hơdoi gĭt kăl păng tơlĕch trong hơmet ming.

Găh trong vă jang atŏk tơiung jang mŭk drăm – tĕch mơdro đơ̆ng bơ̆n hăm dôm teh đak jang hơdoi tơ̆ hơnăp kơnh, ƀok Tổng Bí thư pơma hơdăh, Trong jang đơ̆ng Đảng, Teh đak Việt Nam hơnơ̆ng druh kiơ̆ trong jang tơbôl đơ̆ng kơdih, kơchăng bơ̆ jang kơdih yoa tơdrong rơngei, pơm tơbôl, jang hơdoi păng jang tŏk, tơlĕch lơ trong jang hơdoi lơ pang lơ̆m apŭng plenh teh, pơm ‘lơ̆ng, năng tơdrong đei yoa kơ teh đak, hơdrĕch hơdrung ‘nŏh kăl hlŏh.