Pơgê brei (2/3), tơ̆ Hơnih bơ̆ jang Trung ương Đảng, Tổng Bí thư Tô Lâm pơm tơm jơ bơ̆ jang hăm Ban Nội chính Trung ương păng mĭnh ƀar hơnih bơ̆ jang ƀơm truh vă mơ̆ng păng tơgop nơ̆r găh Tơdrong vă jang “Hop akŏm pơtôch 20 sơnăm jang kiơ̆ Tơdrong tơchơt Trung ương 3 jăl X găh atŏk kơtang tơdrong chĕp pơgơ̆r đơ̆ng Đảng hăm bơ̆ jang tang găn sa pơgơ̆m pơjĭp, pơhoach brăh brư; pơtruh ăn Khul kơdră chĕp pơgơ̆r Trung ương lăng hơlen, pơjing Tơdrong tơchơ̆t găh bơ̆ jang tang găn sa pơgơ̆m pơjĭp, pơhoach brăh brư, bơ̆ jang ưh kơ ‘lơ̆ng lơ̆m jăl ‘nao”. Iung pơma pơtôch jơ bơ̆ jang, Tổng Bí thư Tô Lâm pơma hơdăh, tang găn sa pơgơ̆m pơjĭp, pơhoach brăh brư, jang kơnê̆ ‘noh jĭ tơdrong jang gĭt kăl hloh, hơnơ̆ng, đunh đai kơ bơ̆ jang tơ iung pơjing, ming hơmet Đảng păng khul jang chinh trĭ. Iung jang kơtang tang găn hơlou, pơrăm hŭt tơdrong sa pơgơ̆m pơjĭp, jang ưh kơ ‘lơ̆ng ‘noh trong bơ̆ jang hơnơ̆ng, kăl hloh kơ Đảng, Teh đak bơ̆n. Kơ yuơ lơ loh, tơdrong pơjing Tơdrong tơchơt găh atŏk kơtang tơdrong chĕp pơgơ̆r đơ̆ng Đảng hăm bơ̆ jang tang găn sa pơgơ̆m pơjĭp pơhoach brăh brư lơ̆m jăl ‘nao kơtă tơ̆ Hop akŏm Trung ương 2 jăl XIV, sơkơt hơdăh tơdrong kăl kơ Đang ‘noh “nơ̆r tơchơ̆t” kơ Đảng găh hơnơ̆ng kơrŭn đĭ ai, iung jang hơnơ̆ng iung tơjră tang găn “ayăt kơtă” lơ̆m khei năr kơnh hăm trong bơ̆ jang kiơ̆ trong hle, ‘nao hloh.