Kiơ̆ kơ ‘noh, athei Hải Phòng tŏk kơtang trong tŏk mŭk drăm ‘moi kiơ̆ jang đei iŏk yoa kơjăp, khoa hŏk kmăi kmŏk păng tơplih ‘nao tơchăr.

Pơma hơdăh trong jang, Tơdrong tơchơ̆t Hop akŏm tih mă XIV kơ Đảng, rim Tơdrong tơchơ̆t kơ Hơnih tơm Chinh trĭ păng trong tơlĕch ăn tŏk mŭk drăm ƀar kơsô̆ kăl đei tơlĕch jang kiơ̆ hơdăh, ‘lơ̆ng, Tổng Bí thư athei, tơdrong iung jang kơ Hải Phòng kăl tơlĕch jang mă hơdăh trŏ lăp hloh dơ̆ng, truh hloi jơ ‘năr pơkăp, sơđơ̆ng hơdăh găh bơngai, tơdrong jang, jơ ‘năr, gơh jang, hơnăp jang, pơm hơdăh tơdrong jang, tơklep hăm trong jang dăr lăng, lăng hơlen hơnơ̆ng vă tơtom hơmet ming tơdăh kăl. 

Tổng Bí thư Tô Lâm pơma hơdăh, Hải Phòng kăl pơjing đei hơyak pran lơ̆m atŏk tơ iung kmăi kmŏk gơh hơgei ‘noh jĭ kmăi kmok hơgei, pơm tơlĕch tơmam drăm ‘lơ̆ng păng kmăi kmŏk pơvih pơvăn ăn tơdrong jang đei tŏk kơtang, pơjing đei khul jang kmăi kmŏk gơh hơgei hloh, ‘moi kiơ̆ rơih dôm hơnih jang ‘lơ̆ng tơmơ̆t jên jang, kmăi kmŏk păng dôm trong jang kăl.