Tổng Bí thư hơlen hơdăh, mă đơ̆ng ‘nao pơjing, măt bơngai kon pơlei tŏ sĕt, groi teh mơmat tat, trong nơnăm ƀar păh rim achon dơsĭ oei tim gan ‘lơ̆ng hơ iă, mă lei Thổ Châu jĭ đei hơnih dơ̆ng tôch gĭt kăl, vei lăng năng tông tơdrong oei sa sơđơ̆ng dơ̆ng kơjăp kơ tơring đak dơsĭ Pơmơ̆t pơbăh păng groi teh kơ Teh đak. Sơkơ̆t hơdăh găh tơdrong gĭt kăl lơ̆m vei lăng sơđơ̆ng Teh đak-sơđơ̆ng dơ̆ng kơjăp tơring atŭm hăm tơdrong đei mŭk drăm, Tổng Bí thư athei rim hơnih jang kơrŭn đĭ ai tơ iung pơjing Thổ Châu đei jing tơring đak dơsĭ achon dơsĭ ‘lơ̆ng rŏ nuih mơng, pran kơtang, hơnih tơm atŏk tơ iung kơ Việt Nam, hăm trong jang “Duk yak năm tơ̆ đak dơsĭ să sap; vei lăng đak dơsĭ, vei lăng kon pơlei, vei lăng sơđơ̆ng dơ̆ng kơjăp Teh đak”. Tổng Bí thư pơkă athei dêh char An Giang iung jang hơdoi hăm rim hơnih tơm, hơnih jang tơ iung pơjing Trong proh hơmet atŏk tơ iung kơjăp ‘lơ̆ng; iung jang hơdrol ăn trong nơnăm, tơring kon pơlei oei sơđơ̆ng; mă kăl vei lăng năng tông tơdrong jang pơgang, pơtho pơhrăm, oei sa joh ayŏ vă kon pơlei, kang ƀô̆, ƀô̆ đô̆i kŏng ang, đe hơ ioh tơ̆ tơring achon đak dơsĭ hơtăih yăih.