Tổng Bí thư tơtă, vă hla ar kăl iŏk đei ‘lơ̆ng, tơpă jing pla ŭnh tơ̆k trong lơ̆m pơđĭ khŭl jang chĭnh trĭ ‘noh dôm khŭl jang hơmet ăn hơnơ̆ng dăr lăng, chih tơmơ̆t dơ̆ng, chih pơkeh. Kơchăng, ưh kơ răp gô nơ̆r tơgop đơ̆ng rim tơring mă athei jang hơnơ̆ng klĕp truh hla ar hop akŏm 14 kơ Đảng đei pơdrơ̆ng kiơ̆.

Hơdai hăm hơmet ăn mă hơlen bơ̆n tơmam jang, tơdrong hiôk, jên jang vă jô̆ hơlen păng băt hơdăh tơdrong hơyơ jang hơdrol, tơdrong hơyơ jang đơ̆ng rŏng. Păng athei jô̆ truh tơdrong sơđơ̆ng, đei yua, kơjăp, veh ver đon tơchĕng jăl jang. Tổng Bí thư Tô Lâm pơma hơdăh, dôm khŭl jang hơmet ăn akŏm đon gơh hơgei mă brĕ vă jang đang tơdrong jang đei pơjao vă pơm tơdrong hiôk ‘lơ̆ng hloh vă khŭl kơdră tơring 2 tăl tơ̆ rim tơring păng rim anih jang hơnơ̆ng bơ̆jang hiôk ‘lơ̆ng đei yua.