Hơlen lăng teh chĕng hơmet pơm Hnam kơmăy, Tổng Bí thư Tô Lâm hlôi mơ̆ng roi tơbăt găh tơdrong vă jang, tơdrong krao hơvơn, hrŭ ‘mong vă kon pơlei tơring tơdrong jang pơm kiơ̆ trong jang tơ jur ăn, pơjao teh. Tổng Bí thư athei jăh jang kiơ̆ dôm trong jang pơm hla ar tơdrong jang, roi tơbăt ăn Khŭl kơdră teh đak set hơlen, kĭ ăn păng hơmet ăn jên, vei sơđơ̆ng tơdrong jang.

Đang kơ ‘noh, Tổng Bí thư vang truh pơm lêh tơlĕch jang ming hnam Hnam pơtâp hơkâu jăn, lăm hŏk păng bơ̆n hơnih pơngôi - Hnam trưng Mẫu giáo Phước Dinh, apŭng Thuận Nam. ‘Nâu jĭ tơdrong jang tôch kơ ‘lơ̆ng kŭm hăm đei tôm tơmam pơtho păng hŏk, hăm akŏp jên pơm 12 ti hlak jên yua đơ̆ng Tổng Bí thư pơjao asong. Kơsơ̆ năr âu mơ̆n, Tổng Bí thư păng Khŭl bơ̆jang kơ Trung ương năm lăng Tơnŏk akŏm Cà Ná. Ƀlep ƀơ̆t ‘măng âu, Tổng Bí thư Tô Lâm păng Khŭl bơ̆jang kơ Trung ương truh năm lăng tơ̆ Plei pơm bơ̆n pơnhan, bô̆i, klĭnh Bàu Trúc, tơ̆ thị trấn Phước Dân, apŭng Ninh Phước.