Drơ̆ng nơ̆r krao hơvơn đơ̆ng Tổng Bí thư Đảng Lao động Triều Tiên, Kơdră Quốc vụ teh đak Cộng hòa Dân chủ Nhân dân Triều Tiên Kim Jong Un, Tổng Bí thư Anih chĕp kơ̆l pơgơ̆r Trung ương Đảng Cộng sản Việt Nam Tô Lâm năm ngôi tơ̆ teh đak Cộng hòa Dân chủ Nhân dân Triều Tiên păng truh pơm Lêh tơbăt 80 sơnăm năr pơjing Đảng Lao động Triều Tiên đơ̆ng ‘năr 9 - 11/10/2025.

Lơ̆m ‘măng năm ngôi âu, kơdră chĕp kơ̆l dơnơm 2 Đảng, 2 teh đak gô akŏm pơma dơnuh, băt hơdăh dôm trong jang tih pơtrŭt pơvei 2 păh hơtŏk tơiung đei yua, tơpă, lăp hăm đei yua păng hơpơi ‘meh vă đơ̆ng kon pơlei, lăp hăm dôm tơdrong hơgăt ƀơm truh, tơgop lơ̆m rpngei, sơđơ̆ng, jang hơdai păng hơtŏk tơiung tơ̆ tơring păng lơ̆m apŭng plĕnh teh. 2 păh drơ̆ng nơ̆r hơtŏk loi dơ̆ng dôm ‘măng năm ngôi păng pơma dơnuh kơdră kơpal, pơih să tơƀơ̆p, pơma dơnuh khŭl rim kơdră kiơ̆ kênh Đảng, teh đak păng khŭl tơpôl kon pơlei 1 trong ‘lơ̆ng, đei yua vă hơtŏk loi dơ̆ng hlôh băt dih băl păng tơroi băl tơdrong hlôh vao lơ̆m rim tơdrong jang mă 2 păh đei ‘meh vă.