Pơma pơgơ̆r tơ̆ jơ bơ̆jang, đơ̆ng rŏng mơ̆ng tơroi tơbăt păng tơgop nơ̆r đơ̆ng bơngai tang măt dôm anih tơm, anih jang, Tổng Bí thư Tô Lâm pôk pơ ư, lăng ‘lơ̆ng păng chih iŏk tơdrong hơdrin, dôm jơnei mă Đảng bộ, khŭl kơdră păng kon pơlei dêh char Đồng Tháp hlôi iŏk đei lơ̆m khei ‘năr âu ki.

Pơma hơdăh sơnăm 2025 jĭ sơnăm jang tŏk, ‘lơ̆ng, vă hơdrin iŏk đei jơnei lơ hloh dôm tơdrong hơgăt đơ̆ng trong tơlĕch jang hơtŏk tơiung mŭk drăm - tơpôl 5 sơnăm, jăl jang 2021 - 2025 păng tơdrong tơchơ̆t Hop akŏm bơngai tang măt Đảng bộ dêh char Đồng Tháp ‘măng mă XI, jăl jang 2020 - 2025, Tổng Bí thư athei, Khŭl chĕp kơ̆l pơgơ̆r Đảng bộ dêh char Đồng Tháp đei trong jang kơtang vă jang kiơ̆ jơnei hơnăp jang hơtŏk tơiung mŭk drăm - tơpôl 2025, akŏm hơdrin iŏk đei kơ sô̆ lơ hloh dôm tơdrong hơgăt tơlĕch ăn, mă loi ‘noh jĭ dôm tơdrong hơgăt ƀơm truh mŭk drăm tŏk, iŏk yua đơ̆ng kon pơlei.