Pơgê 5/12, Tổng Bí thư Tô Lâm pơgơ̆r jơ bơ̆ jang hăm Khul kơdră chĕp kơ̆l Đảng ƀô̆ dêh char Ninh Thuận găh tơdrong bơ̆ jang kiơ̆ Tơdrong tơchơ̆t đơ̆ng Hop akŏm mă 13 kơ Đảng păng tơdrong tơchơ̆t đơ̆ng Hop akŏm Đảng ƀô̆ dêh char ‘măng mă 14 jăl jang đơ̆ng 2020-2025; tơdrong pơgơ̆r hŏk pơhrăm, jang kiơ̆ Nơ̆r pơtho đơ̆ng Anih tơm Chinh trĭ păng dôm hla ar chih đơ̆ng Trung ương păng tơdrong vă tơlĕch trong tơmât jên jang Man hnam kơmăy unh điên hat nhân Ninh Thuận khei ‘năr âu.

Pơma pơtôch jơ bơ̆ jang, Tổng Bí thư Tô Lâm akhan, kon pơlei Ninh Thuận păng dôm tơring jŭm dăr vang tơgŭm, chĕng hơmet teh, ‘măn tơmam vă atŏk tơiung unh hơyuh pơyoa ăn tơdrong jang tŏk ăn teh đak, ưh jor gô đei xa yoa tôch tơgăl đơ̆ng dôm tơdrong jơnei mưh jang tŏk. Đảng păng teh đak vă chă rơih dôm kơmăy hat nhân ‘lơ̆ng hlŏh, rơih dôm anih jang roi tơƀôh ‘lơ̆ng hlŏh, pơtho pơhrăm khul vei lăng ‘lơ̆ng hlŏh vă pơm ‘lơ̆ng ăn tơdỏng vei sơđơ̆ng ăn kơmăy kơdâu păng tơdrong đei yoa đơ̆ng anih jang unh hơyuh âu ăn teh đak, ưh lăp yoa chăl dang ei đĕch mă yoa jơhnơr kon sâu ning mônh kơnh hai.