Tơ̆ jơ pơm jang, Tổng Bí thư ră hơdah 6 tơchơ̆t jang tih, athei sơkơ̆t trŏ tơdrong jang, tơlĕch tơdrong jang trŏ hăm jơhnơr hơrih păng đon tơchĕng hơtŏk tơ-iung đunh khei năr. Tơchơ̆t athei trŏ hăm pơkăp hơtŏk 2 kơsô̆ kơ Việt Nam truh sơnăm 2045, tơƀôh tơdrong khŏm mă rơih trŏ hăm jơhnơr hơrih vă pơm jang trŏ hăm tơdrong hơpơi hơtŏk tơ-iung teh đak. Hơtŏk athei vei sơđơ̆ng tơdrong 'lơ̆ng, rơgoh păng kơchăng.

Vă đei jơnei tơchơ̆t jang tenh kuăng păng kơjăp sơđơ̆ng, kăl tơrĕk kăp gĭt truh tơdrong kơchĕng vă hơtŏk tơ-iung lơ̆m tôm hơnih jang chinh trĭ păng tơpôl; lăng ou ưh hơdrô̆ jing tơchơ̆t jang gah mŭk drăm mă jing sơnong jang chinh trĭ dơnơm, kăl hloh; sut lê̆ đon tơchĕng sơđơ̆ng kiơ̆ jăl jang, jang minh hơnih; iŏk jang kiơ̆ pơkăp pơ̆n tơchĕng pơ̆n pơm jang, chiu pŭ sơnong jang; pơm jang drơ̆ng minh, asong jang hơdah, jang hơdoi kơjăp đơ̆ng Trung ương, tơring păng hơnih jang mŭk drăm; iŏk khua hŏk kŏng ngê̆, tơplih 'nao gơh hơgei, tơplih kơmăi kơsô̆ pơm tơm kơ tơdrong jang hơtŏk tơ-iung 'nao.