Kơsơ̆ brei, năr 30/03, tơ̆ Hà Nội, Đảng ủy Hơnih bơ̆ jang Trung ương Đảng pơgơ̆r pơm lêh pôk ăn Mê đai Quân công păng Huy hiệu 45 sơnăm, 40 sơnăm păng 30 sơnăm jang Đảng. Tang măt ăn kơdră chĕp pơgơ̆r Đảng, Teh đak, Tổng Bí thư Tô Lâm pôk ăn Mê đai Quân công dơ̆ng mă Blŭng păng pôk ăn Huy hiệu 40 sơnăm jang Đảng ăn kơ ƀok Phạm Minh Chính, Kơdră jang lơ̆m Hơnih tơm Chinh trĭ jăl XIII, Thủ tướng Teh đak. Tang măt ăn rim kơdră đei sơng iŏk Mê đak Quân công dơ̆ng mă Blŭng păng rim Huy hiệu Đảng, Thủ tướng Phạm Minh Chính pơma tơbăt jơhngơ̆m đơ̆ng mă đei mơ̆t lơ̆m khul Đảng, ling lang chĕp kơjăp nơ̆r pơkăp kơ bơngai Đảng viên: Ling lang kiơ̆ yok rok jơ̆ng kơjăp trong bơ̆ jang kech mang kơ Đảng, kơ yuơ pơm tơm kơdih hơdrĕch hơdrung atŭm tơklep kơjăp hăm CNXH, kơ yuơ phĭ tơtŏ dơnŏ ‘lơ̆ng dơ̆ng kơjăp, hơnŭk hơnoa kơ kon pơlei, ling lang iŏk jang păng hơdrin jang keh đang dôm tơdrong jang đei Đảng, Teh đak păng kon pơlei lui yom pơjao ăn. Adoi lui kơjăp akhan, hăm tơdrong chĕp pơgơ̆r đơ̆ng Đảng, mă hơnơ̆ng ‘noh Hơnih tơm Chinh trĭ, Ban Bí thư, dơ̆ng hơlou ‘noh Tổng Bí thư Tô Lâm, teh đak gô atok tơ iung kơtang găh tôm tơdrong, iung jang kiơ̆ jơnei ƀar tơdrong tơlĕch ăn 100 sơnăm, ba teh đak yak mơ̆t kơjăp lơ̆m chăl hle - chăl atŏk tơ iung pơdrong pran kơtang, gơh hơgei, hơnŭk hơnoa, prn kơjăp iăp kơtang yak mơ̆t lơ̆m CNXH.