Pơma dơnuh hăm lơ kang ƀô̆, bơngai pơtho, đe sinh viên, khul linh lơ̆m Hŏk viê̆n, Tổng Bí thư Tô Lâm pôk bơnê kơ dôm tơdrong jang đei jơnei kơ Hŏk viê̆n Ki thuơ̆t khul linh lơ̆m jê̆ 60 sơnăm kơ ou, hơdah noh hlôi pơtho ăn Khul linh păng teh đak bơngai jang hơgei lơ̆m lơ tơdrong jang, hăm hloh 200 tiến sĩ, 1.500 thạc sĩ, 3.000 ki sư tơdrong jang linh păng kon pơlei. Dang ei hnam trưng tŏk bŏk pơtoi pơtho hloh 6.000 bơngai hŏk, sinh viên.

Đơ̆ng rŏng kơ tơblang hơdah tơdrong đei ƀôh lơ̆m teh đak păng lơ̆m kơpal teh, Tổng Bí thư ră hơdah, Tơchơ̆t Hop akŏm 14 kơ Đảng sơkơ̆t hơdah: Pơjing Khul linh kon pơlei kăch mang, gơh hơgei hơbĕch hơbal, kơtă lơ̆m jăl jang 2025-2030, yuơ noh hăm sơnong jang pơtho bơngai jang gơh hơgei, Hŏk viê̆n kăl akŏm pơm kiơ̆ 5 tơdrong tơplih 'nao kơtang gah tơdrong pơtho pơhrăm kiơ̆ trong 'nao, kăp gĭt tơroh kơjăp hăm tơdrong hơrih, hơtŏk kơtang tơdrong jang hơdoi lơ̆m apŭng plenh teh. Tổng Bí thư akhan, Hŏk viê̆n hơtŏk kơtang tơdrong yua kơmăi kơsô̆; pơjing hnam trưng đăi hŏk hơlen kăp gĭt kơ teh đak, jing sơnong chơng trong ăn dôm tơdrong jang hơlen chih akŏm khua hŏk ki thuơ̆t khul linh, jing hơnih tơm tơplih 'nao gơh hơgei kơ teh đak.