Iung pơma pơtôch hop akŏm, Tổng Bí thư tơbăt hơdăh 6 trong jang tih vă Hơnih chĕp pơgơ̆r păng rim hơnih tơm, hơnih bơ̆ jang tơring tơrang kăl jang kiơ̆ lơ̆m khei năr kơnh, lơ̆m ou kăl sơkơ̆t hơdăh trong tơlĕch ăn atok tơ iung kmăi kmŏk kăl tơklep hăm trong tơlĕch jang atok tơ iung teh đak, tơdrong đei iok yoa đunh đai tai sơnăm kơ teh đak. Tổng Bí thư athei, tơplih ‘nao kơtang trong bơ̆ jang hrei ou; sơkơ̆t hơdăh hơnăp jang kơ bơngai chĕp kơ̆l; adoi pơtrut kơtang trong tơplih ‘nao tơchăr, tơgum djru hơnih mơdro sa pơjing tơdrong jang tơplih ‘nao tơchăr, hơnih mơdro sa khoa hok păng kmăi kmŏk; pơjing rim hơnih tơm tơplih ‘nao tơchăr pran kơtang, gơh hơgei vă tơgoăt iung jang tơchĕng hơlen hăm hơnih mơdro sa. Atum hăm athei, dăr lăng, hơmet ming, tơ iung pơjing trong bơ̆ jang pơtho pơhrăm khul jang hơgei pơvih pơvăn ăn atok tơ iung kmăi kmŏk git kăl, Tổng Bí thư pơma hơdăh, pơđĭ khul chinh trĭ kăl iung jang kơtang hloh dơ̆ng, nŏng hloh dơ̆ng, jơnei hloh dơ̆ng. Tơdrong mă teh đak ‘meh vă hrei ou ‘noh ưh khan lăp hơdrin đĭ ai chinh trĭ, mă oei iung jang iok đei jơnei hơdăh, jĭ tơdrong iung jang tơpă kơ pơđĭ lơ̆m khul chinh trĭ, tơpôl hơnih mơdro sa, khul hơgei, bơngai khoa hŏk păng lơ̆m tơpôl.