Hăm ƀĕnh jơhngâm đon kŭp yom, Tổng Bí thư Tô Lâm sŏh hlôt nhang ƀou phu, kŭp kơ̆l ƀlŏk hơdơ̆r kơ Ƀok Hô – Kơdră chĕp kơ̆l ‘mêm kơ eng kơ hơdrĕch hơdrung Việt Nam. Tổng Bí thư Tô Lâm chih tơƀôh jơhngâm đon ƀlŏk hơdơ̆r: “Truh tơ̆ âu, bơ̆n roi băt hơdăh hlŏh dơ̆ng yoa kiơ Ƀok Hô ưh lăp tơdrong hưch hanh, čhôk ‘nă kơ hơdrĕch Việt Nam đĕch mă jơ̆p lơ̆m plei teh kŭm kŭp yom, pôk pơ ư. Vih tơ̆ âu, bơ̆n nhen đei brŏk tơ̆ hnam kơdih, hăm ƀĕnh jơhngâm đon ‘mêm kơ eng panwg nhen oei hơnơ̆ng ƀôh Ƀok tơ̆ âu”.

Pơma nuh hăm kăn ƀô̆, bơngai jang tơ̆ Anih gru groa âu, Tổng Bí thư akhan, đei truh ngôi tơ̆ Anih Ƀok Hô oei păng bơ̆ jang ƀât oei arih sơ̆ ƀôh lơ̆m jơhngâm tôch hơiă, ‘mêm kơ eng, rim tơmam Ƀok Hô yoa tôch juăt, tơƀôh hơdăh um ai kơ bơngai chĕp kơ̆l pơgơ̆r tôch gơ̆h hơgei. Tơchĕng ‘lơ̆ng kăn ƀô̆, bơngai jang tơ̆ Anih âu hlôi bơ̆ jang tôch tơnăp păng vei lăng ‘lơ̆ng rim tơmam tơ̆ Anih gru groa tơgŭm ăn tơmoi lơ̆m apŭng plenh teh păng lơ̆m teh đak truh ngôi tơ̆ âu nhen ƀôh Ƀok Hô oei hơnơ̆ng oei hơdai hăm bơ̆n.