Tơ̆ jơ sơng, Tổng Bí thư akhan, tơdrong đei măt lơ lap đơ̆ng dôm bơngai đei đon tơchĕng gơh hơgei, hlôh vao jrŭ lơ̆m teh đak păng apŭng plĕnh teh tơƀôh 1 nơ̆r pơma gĭt kăl: Việt Nam ưh khan lăp jing teh đak chĕng hơlen, mă hlôi jing 1 teh đak jang hơdai gơh hơgei đơ̆ng dôm bơngai Việt Nam đei đon tơchĕng gơh hơgei, hlôh vao jrŭ. Tổng Bí thư Tô Lâm bơnê kơ tơpôl đei đon tơchĕng gơh hơgei, hlôh vao jrŭ hlôi ‘măn đĭ jơhngơ̆m ăn Việt Nam lơ sơnăm âu ki, tơƀôh đon ‘meh vă dôm bơngai joăt jang, bơngai hŏk jrŭ hơnơ̆ng vang yak hơdai, ưh khan lăp hăm tơdrong ‘mêm mă hăm đon gơh hơgei khoa hŏk, tơblang hơdai trong jang tơgŭm kiơ̆ lơ̆m băt kơnăl khoa hŏk, pơtrŭt athei mă hơdai, ‘lơ̆ng, gơh tơlĕch jang kiơ̆. Hơdai hăm ‘noh,  Tổng Bí thư hơmĕng păng iŏk tơmam dôm tơdrong tơchĕng hơlen găh Việt Nam gô roi ‘năr roi tơklep hăm dôm tơdrong tŏk bŏk tơlĕch ăn 1 trong kăl.

Hăm hơpơi ‘meh tôch kơ tih, mă lei kŭm hăm jơhngơ̆m ưh kơ pơ ang, băt răp mơ̆ng, Tổng Bí thư Tô Lâm pơma hơdăh Việt Nam ling lang lăng kăl pơma dơnuh, jang hơdai, pơyom khôi luơ̆t apŭng plĕnh teh, hơtŏk ‘lơ̆ng trong jang lơ pang đei yua, hơtŏ băl vă pơjing 1 Việt Nam hiôk hian, hơdrin kơdih, tơplih ‘nao gơh hơgei, hơtŏk tơiung hrĕnh păng kơjăp lơ̆m chăl ‘nao.