Tổng Bí thư pơma hơdăh, Mi jĭ teh đak jang mŭk drăm păng tơmât jên jang tơm hăm Việt Nam, chih răk dôm tơdrong jang tŏk hrĕnh, tôm tơdrong đơ̆ng lơ̆m tơdrong pơvei Việt Nam – Mi lơ̆m 30 sơnăm âu ki iŏk đơ̆ng hơmet pơ ‘lơ̆ng dơ̆ng tơdrong pơvei, tơdrong jang hơdoi mŭk drăm, tĕch mơdro păng tơmât jên jang hơnơ̆ng jĭ tơdrong tơm lơ̆m tơdrong pơvei 2 pang.

Tổng Bí thư hơpơi ‘mĕh, dôm bơngai tơmât jên jang đơ̆ng teh đak đe, lơ̆m noh đei bơngai tơmât jên jang đơ̆ng teh đak Mi hơnơ̆ng hơtŏk jên jang xa tơ̆ Việt Nam, mă loi jĭ lơ̆m tơdrong tơplih hăm kơmăy sô̆, tơplih rơgŏh ‘lơ̆ng, jang unh hơyuh rơgŏh, tơjră hăm tŏ’mi kial tơplih. Tổng Bí thư Tô Lâm oei athei dôm anih tĕch mơdro đơ̆ng Mi, lơ̆m noh đei Anih mong jên KKR hơnơ̆ng tơgop ‘lơ̆ng ăn tơdrong tưk tơiung tơdrong jang hơdoi 2 pang, mă loi ‘nŏh găh mŭk drăm, khoa hŏk păng kơmăy kơmŏk đơ̆ng 2 teh đak.