Lơ̆m ‘măng iung năm tơmang teh đak Phần Lan đơ̆ng năr 20-22/10, tơ̆ Helsinki, Tổng Bí thư Ban Chấp hành Trung ương Đảng Cộng sản Việt Nam Tô Lâm hlôi đei ‘măng pơma dơnuh kơtă hăm Kơdră chĕp pơgơ̆r Đảng Cộng sản Phần Lan yă Tiina Sandberg. Tơ̆ jơ tơƀơ̆p, ƀok Tổng Bí thư Tô Lâm tơbăt, ‘măng năm tơmang ou, ƀar păh hlôi drơ̆ng mĭnh nơ̆r pơm hơtŏk tơgoăt tơgoăl Jang hơdoi gĭt kăl. Khei năr kơnh, Tổng Bí thư Tô Lâm athei ƀar Đảng hơnơ̆ng atŏk kơtang tơƀơ̆p dih băl, pơtrŭt kơtang tơgoăt tơgoăl jang hơdoi kơtang hloh dơ̆ng, tơpă hloh dơ̆ng ‘moi kiơ̆ rim tơdrong jang ăn khul kơdră năm ngôi, tơƀơ̆p dih băl păng pơma dơnuh dih băl; vei kơjăp jang hơdoi păng iung jang hơdoi tơ̆ rim ‘măng hop akom lơ pang găh Đảng mă ƀar Đảng ‘noh lơ̆m khul, lơ̆m ou đei Hop akom rim Đảng Cộng sản păng Kŏng nhân apŭng plĕnh teh; kiơ̆ yok rok jơ̆ng ‘lơ̆ng hơnăp jang kơ Đảng kơdih adoi nhen Khul tơgoăt tơgoăl lơ̆m tơbăt dih băl kơtơ̆ng ang, pơgơ̆r rim tơdrong joh ayŏ kơdŏ soang, kon pơlei năm ngôi dih băl vă atŏk kơtang hloh dơ̆ng tơdrong tơgoăt tơgoăl păng hlôh vao dih băl ƀar păh kon pơlei ƀar teh đak; tơgŭm djru kon pơlei Việt Nam păng Phần Lan tơ̆ teh đak hơrih sa, hŏk pơhrăm păng bơ̆ jang tơ̆ noh.