Tơ̆ jơ tơƀơ̆p, Tổng Bí thư Tô Lâm pơma hơdăh ƀar teh đak tơbăt dih băl lơ tơdrong lei lăi dih băl lơ̆m trong atŏk tơ iung teh đak, jei vang tơlĕch ăn trong jang đei jing teh đak atŏk tơ iung gơ̆h hơgei đơ̆ng rŏng 100 sơnăm pơjing teh đak (hăm Việt Nam ‘noh lơ̆m sơnăm 2045, hăm Ấn Độ ‘noh sơnăm 2047), kơ yuơ lơ loh kăl atŏk kơtang hloh dơ̆ng jang hơdoi lơ̆m rim tơdrong, mă kăl ‘noh pơtrŭt kơtang tơgoăt tơgoăl mŭk drăm, mơdro sa, tơmơt jên jang tơgăl hăm dôm tơdrong đei. Tổng Bí thư Tô Lâm hôn bơnê kơ Grup jang Adani lăng kơjăp păng tơ iung pơjing trong jang tơmơ̆t jên jang đunh sơnăm tơ̆ Việt Nam, đơ̆ng noh tơgop atŏk kơtang jang hơdoi, tơgoăt dih băl ƀar tơdrong jang mŭk drăm Việt Nam hăm Ấn Độ. Tổng Bí thư tơgoăt iŏk dôm nơ̆r chă pơma athei đơ̆ng Grup jang, athei Grup jang iung jang hloi hăm rim Hơnih tơm, hơnih jang, tơring vă pơma dơnuh, pơm hơdăh hloh dơ̆ng rim tơdrong ‘meh vă, pơchoh trong jang hơdoi, đơ̆ng noh atŏk kơtang tơlĕch jang tĕnh koăng rim tơdrong vă jang tơmơ̆t jên jang tơ̆ Việt Nam.