Tổng Bí thư Tô Lâm sơkơ̆t hơdăh, Việt Nam lăng kơjăp tơgoăt tơgoăl hăm Nhật Bản; akhan, dôm tơdrong mă khul kơdră Nhật Bản păng JBIC lăng kơjăp jei jing dôm trong tơlĕch jang kơtang đơ̆ng Việt Nam lơ̆m khei năr kơnh, lơ̆m ou đei trong nơnăm, ŭnh hơyuh, kmăi kmŏk kơsô̆. Tổng Bí thư  Tô Lâm hôn bơnê trong tơchăr Tơpôl châu Á tơlĕch ‘nhui 0 (AZEC) kơ yuơ Thủ tướng so Nhật Bản Kishida Fumio tơlĕch ăn păng tŏk bŏk hơdrin iung jang kiơ̆ trong tơlĕch jang truh sơnăm 2050 mă Việt Nam hlôi pơkăp tơ̆ COP26. Việt Nam drơ̆ng iung jang hơdoi hăm Nhật Bản păng rim teh đak lơ̆m rim tơdrong ‘nao pơma truh ‘noh, athei Nhật Bản hăm JBIC hơnơ̆ng yak hơdoi vang atŏk tơ iung kơ Việt Nam, adoi lăng ba kơjăp pơtrŭt kơtang tơgoăt trong nơnăm ƀar păh rim teh đak Đông Nam Á, Tơring iĕ Mê Công pơ đĭ trong nơnăm, ŭnh hơyuh, kmăi kmŏk chih răk tih.