Tơ̆ jơ tơƀâp, Tổng Bí thư tơroi hrĕnh rim tơdrong lơ̆m teh đak, mă loi ‘nŏh jĭ tơdrong hơmet ăn Hop akŏm mă XIV kơ Đảng. Truh dang ei, Hop akŏm đảng ƀô̆ jơ̆p tơring păng kiơ̆ đơ̆ng dôm tơring hlôi pơgơ̆r đang; rim đảng ƀô̆ găh Trung ương vă pơtôch jăl jang lơ̆m khei 10/2025.

Găh mŭk drăm, tơpôl, tơchĕng adrol sơnăm ‘nâu đĭ đăng 15/15 tơdrong hơgăt jang đei ngăl, lơ̆m noh tơdrong thu mong jên teh đak rŏ năng đei tôch lơ truh 2,5 triu ti hlak jên. Tổng Bí thư chih iŏk dôm nơ̆r tơgop tơpăt ‘lơ̆ng đơ̆ng Hà Nội lơ̆m tơdrong jơnei atŭm kơ teh đak, atŭm hăm ‘nŏh pơma hơdăh tơdrong jơnei âu tơƀôh hơdăh đon adrin, bơ̆ jang tôch pơneh đơ̆ng đĭ đăng kon pơlei. Ƀok pơma hơdăh tơdrong gĭt kăl hlŏh jĭ teh đak đei vei lăng sơđơ̆ng ‘lơ̆ng, rơngei hiôk hian păng jang tŏk pran kơjăp.