Đơ̆ng trong jang đei tơlĕch ‘năr 1/7/2024 truh dang ei, lơ̆m teh đak pơjing hlŏh 86 rơbâu Grŭp vei lăng sơđơ̆ng hăm hlŏh 276 ‘nu bơngai jang. Khul âu roi tơbăt ăn công an xăh hlŏh 141 rơbâu tơdrong srĕp, tơgŭm sek tơlang hlŏh 90 rơbâu tơdrong, vang tơgop vei kơjăp tơdrong sơđơ̆ng tơ̆ tơring.

Tơ̆ jơ tơƀâp, Tổng Bí thư tơchĕng ‘lơ̆ng tơdrong jang mă khul âu hlôi iŏk đei, atŭm hăm ‘nŏh tơƀôh đon mơnat hăm dôm tơdrong pơmat tat, gleh hrat đơ̆ng khul jang tơ̆ tơring. Tổng Bí thư pơma hơdăh Đảng, Teh đak vă hơnơ̆ng hơmet pơ ‘lơ̆ng trong pơgơ̆r, tơdrong tơgŭm vă khul âu jing “khul linh” gĭt kăl lơ̆m tơdrong vei lăng sơđơ̆ng. Tơ̆ hơnăp kơnh, Tổng Bí thư athei dôm anih tơm, anih jang kơpal, tơring tơrang hơtŏk tơdrong roi tơbăt, pơm ăn tơpôl drơ̆ng 1 ƀơ̆r đon, vang tơgŭm pơjing khul vei lăng tơ̆ tơring pran kơjăp.